Kohima Press Club-i 17buba Foundation Day anogomong among

Kohima, Aenjeti 20 (TYO): Kohima Press Club (KPC) ya state yimtiba nung lokti tentet ajungkettsütsü, iba den külemi state nung osangbenertem ajungkettsü nükjidong yur 2001 küm tenteta liasü, aser KPC tenteter küm 17 ajungba anogomong sentong ka tanü Congress Bhavan, Kohima Conference hall nung mongogo, ta tanü Kohima Press Club (KBC), tongti tezülur, Alice Yhoshü-i sangdong ka ajanga metetdaktsü.
Tir o jembiba mapang, KPC tir Xavier Rutsa-i KPC tentetba otsü lemsatep. KPC ya 2001 küm züngsem ishikati tenzük aser state nung Press Club tambusang aküm, ta Rutsa-i ashi. KPC ya züngsem ishika nungi tenzük, saka tangbo telok tashitait ka küma tanübo print aser electronic media nungi züngsem 56 tenüng züluoka lir, ta Rutsa-i ashi. Paisa iba club tenzüker aser züngsemtemi mapang ajak nung yaritepba asoshi pelaba shisem.
Kasa sentong nung Press Club nung züngsem tain rongnungi Oken Jeet Sandham aser Narain B. Sagar natia o jembi aser iba club aser züngsemtem ajangzüktsü indang tebilembatem lemsatepa liasü. Parnokisa taruba Nagaland Assembly Election 2018 nung osangbener yimya shidak amshia osang tejangja agütsütsü ajungshi.
Iba sentong tenzükba mapang KPC züngsem, Rana Chetri-i sarasadem aser KPC general secretary, Alice Yhoshü aser senyur, Ng. Solomon Sha nati küm tepiyong inyaka aruba osang agütsü. Iba sentong ya KPC züngsem, Vishü Rita Krocha-i ketdangsüa ani. Iba sentong nung KPC züngsem 34 den temulungertem arua aden.
Kasa mapang nung Nagaland Pradesh Congress Committee-i Press Club nem iba anogomung amungtsü asoshi parnok indang conference hall amshidaktsüba asoshi KPC ajanga pelaba metetdaktsü.