Kohima Press Club-i Kripa Centre semdang

Kohima, January 26 (TYO): Brihostibarnü 68buba Republic Day anogomung nung Kohima Press Club (KPC)-i Kripa Foundation Centre Kohima semdanga liasü.
Iba sentong nung Kripa Kohima director, Abou Mere-i yi jemertem aser temesepba mozü achirtem nem rehabilitation service balala agütsütsü nükjidong nung 1981 küm Kripa Foundation tenzükba otsü metetdaktsü.
Pai ashiba agi, Nagaland nung injecting drug users (IDUs) tali bulua akumdang 1990 küm iba foundation tenzüka IDUs aser yi jemertem anepalua treatment, counselling aser awareness agütsü.
Mere-i ashiba agi, tangbo Kripa Kohima ya regional rehabilitation centre ka ama kümogo aser Nagaland, Meghalaya aser Arunachal Pradesh nungi nisungtem tenzüka yarir.
Mere-isa, press aser media, talisa Kohima Press Club züngsemtemi osangkakettem ajanga loktiliba aser health tebilemtsü onüktem metetdaktsüba atema pelar, ta ashiba külemi osangbenertemi maneni iba mapa tajung inyaktsü mepishi.
KPC Tir, Xavier Rutsa-ia mapang tatsüka agia jembi aser KPC-i semdangba nükjidong lemsatep.
Kasa sentong nung Kripa nung amunger anati yi ajemba intoktsü merangba aser koktetba indang lemsatep. Tenati, achi-ajem yimya sübaba (addiction) ya tashidak ka lir aser iba ajanga shirangertem atema teimla lir, ta metetdaktsü.
Kripa nung counselor, Bange Konyak-i tepela anküp o jembidang KPCi semdanga yangji amungertem den shisalemsatepba den ajungshiba atema pelaba lemsatep.
“Nisung aikati mozü chirtem aser yi jemertem sendoker, saka nenoki mapang agütsüteta onok semdangba atema pelar,” ta Bange Konyak-i ashi.
Tang Kripa Centre Kohima nung patient 29 lir. Iba anogo nung KPC-i nüngdak oset kar Kripa nem tenla agütsü. KPC züngsem 15-i Kripa semdanga liasü.