Kohima Press Club-i Viya Sekhose mang ayimer

Dimapur, Rongchii/April 10 (TYO): Viya Sekhose asüba osang angazüka Kohima Press Club (KPC) kanga mepelar, shiba Nagaland nung journalism tsütsü mezüngpur liasü. Pa arishi küm 77buba nung April 10 nü Kohima nung süogo.
Sekhose,1970s tetenzüklen ‘Citizens Voice’ nung inyak aser iba sülen 1976 küm hopta shia adokba osang kaket ‘The Guardian’ tenzük koba ‘The Kohima Weekly’ agi melener 1990s tashi adoka aru. Pa Nagaland Journalists’ Association nung secretary ama inyakogo aser Kohima Press Club den küm aika sendaktepa liasü.
Pa osang bener ka ama inyakba mapang facility peria maliba ajanga journalism profession ama inyakertem kanga kangshia aruogo. Iba mapang nung osang kakettem aikabo male maser yamaji sorkar nungi advertisements ishika dang aruba den shishilembartem kodanga add madoktsü. Item kulitem ajak ajanga newspaper industry ya non-profitable industry ka kümdaktsü. Editors tema-i publisher, reporter aser printers aser business-cum-circulation manager mapa ajak arepa inyaka liasü.
Viya Sekhose ya item rongnung densema liasü, shibai hopta osang kaket adoktsü asoshi tejangraba aser temulungtetba tulu nung kanga meranga inyakogo. Iba amala timtem ajurua inyaker rongnung paa ka alir. Nagaland nung tang osangbenertem tang koba jenjang nung lir iba atema parnok nem tenüngsang agütsütsü nüngdaker aser parnoki osang kaket azüngertem koda tenzük iba indang bilemdang süngmanger.
Sekhose ya kanga dang ajemaluba aser shisataka nisung ka liasü. Pai o anep anepa jembi shiba tangar tajung indang teti jembia liasü.
Pa asüba osang angazüka Nagaland nung külem osangbenertem temulung zürepra aser lanur osangbenertemi takoksa ama bilemer.
Kohima Press Club nung züngsemtemi par kinungertem den asükhu lemsateper. Pa tanüla tesunep nung anisüngzükdakjang ta sarasademtsür, ta KPC, Acting President Atul Sarma aser General Secretary Alice Yhoshü nati sangdong ka ajanga lemsatep.