Kohima Press Club (KPC) küm 15 jungogo

Kohima, January 20 (TYO) : Kohima Press Club (KPC) pur Bodbarnü 20 buba Foundation Day takok ngua mungogo. Iba sentong ya Kohima Municipal Council office nung aliba New KPC Office nung agia liasü.
Kohima nung media wadang nung mezüngpur kari 2001 küm January 20 nü KPC tentet aser iba sülen iba club küm 15 tashi liyonga aruogo, ta tanü sentong nung KPC President, Xavier Rutsa-i ashi.
Nagaland nung aliba Press Club tem rongnung KPC tambutiba lir aser tesüiba küm 15 tsüngda media wadang nung mapa jenti inyakyonga arur. KPC-i nübortem tenzükba mapa nung tenüngsang angutsüsa mapatem inyakogo aser tanü KPC pa sasa noktakteta lir, ta Xavier-isa ashi.
Tanü KPC nung print aser electronic media nungi registered members 42 lir aser ano maneni Club nung züngsem aika adentsü lir, ta paisa metetdaktsü.
Tesüiba küm 15 tsüngda KPC President 7 aser General Secretary 6 melentepa mapa inyak aser parnok rongnung mezüngbuba KPC President Dipak Chetri, tasembuba General Secretary Daiho Mao aser züngsem ana – Kevi M Sanyu aser Theyeveyi Cumu nunger iba alima toktsür pilaogo, ta Xavier-isa ashi.
Tanü agiba sentong nungsa KPC adviser Kopelo Krome, Oken Jeet Sandham senior member KPC aser DIPR Additional Director Limawati Ao nungeria o jembi.
Sentong nung mendenji KPC Joint Secretary, Ng Solomon Sha liasü, Mission Convener NBCK, Rana Chetri-i temoatsü meshia sarasadem aser adviser Kopelo Krome o Xavier nati KPC 15 buba anniversary souvenir aser amended constitution booklet sayaa liasü.