Kohima Smart City atema Nagaland-i DPR tasen agütsütsü

Kohima, March 31 (TYO) : Smart Cities Mission (SCM) mezüngbuba tarensen 20 nung mezüngokba sülen Nagaland sorkari fast track cities 23 nungi state yimtiba – Kohima SCM nung dendaktsütsü atema mapa inyaker.
“Mezüngbuba shilem nung asenoki 50 marks metongtet saka Union Ministry of Urban Development-i yimli sayua 23 Fast Track Cities nung Kohima dendakja lir. Sorkari Fast Track Cities 23 shimteta aliba nungi Smart City yanglutsü atema yimti 15 shimtsü” ta Nagaland Parliamentary Secretary, R Tohanba-i tanü osangbenertem dang ashi.
Kohima Municipal Council (KMC)-i state yimtiba nung alirtem aser Gurgaon-nungi Voyants Solutions Pvt. Ltd. den asüngdangyaba sülen Union Ministry of Urban Development nem Detailed Project Report ka agütsütsü renemogo, ta paisa ashi.
Iba DPR ji April 10 nü agütsütsü aser April 15 nü result metetdaktsütsü, ta R Tohanba-isa shisem.
“Nüngdakba cutout mark angutsü atema onoki line department tem den kanga meranga mapa inyakdar aser tanbo SCM nung Kohima densemtsü imlar” ta paisa metetdaktsü.
Smart Cities Mission (SCM) kübok Kohima nung kiojentem melenshitsüsa akümtsü ta nisungtemi arentaka bilemer saka ibaji aibelena angatetba ka lir. Kohima nung alir nem electricity, water supply, information technology, traffic, security aser gari lenmangtem tajungba agütsütsü atema onoki Smart City kümdaktsütsü tebilemba lir, ta Tohanba-isa ashi.
Secretary Municipal Affairs, Dr Maongwati Aier-ia ashiba agi, SCM tongtettsü atema Municipal Affairs Department aser KMC nati sorkar department 30 den timba Mission kübok anidenogo.
“Tourism aser Asian linüktem atema Kohima ji tiyongtsü tesem ka kümdaktsütsü atema onoki mapa inyaker” ta paisa shisem.
Kohima nung World War-II cemetery tulutiba lir aser Kohima adena Asian Highway-1 süiba ajanga Asian linüktem atema tongtipang tesem ka kümdaktsünür, ta Dr. Maongwati-isa metetdaktsü.
Kohima Village Council-ia ali kibur inyakyim nung KMC den yariteptsü mulunga agizükogo aser project report kübok mapatong teimbaka sorkar kimung nung inyaktsü enoka lir, ta paisa ashi.
SCM atema shimokba sülen, India sorkar aser State sorkar tsüngda 50:50 telemsa nung sen crore 1000 atema alizüng yur mapa inyaktsü. Ano, PPP mode ajanga state adena orr aliba telok pungui sen crore 2000 enoksemtsü, ta Dr. Maongwatisa shisem.