Kohima Smart City mapatong nung senso ajaki shilem agitsüla: TR Zeliang

November 23, 2015 nü State Banquet Hall Kohima nung Nagaland Chief Minister TR Zeliang-i Kohima Smart City mission senden nung o jembiba angur.

Kohima, November 23 (TYO) : Kohima Smart City Project takok ngudaktsütsü atema senso ajaki nungita yariteptsüla, ta Nagaland Chief Minister, TR Zeliang-i ashi.
“Iba mapatong takok ngua inyaktsü atema nija mesüra kidong ali kiburtemi tetsükdaktsü bener marutsüla. Kohima smart city kümdaktsütsü atema senso aser ali kibur ajaki tebilemtsü khuret lemsateptsüla” ta State Banquet Hall nung Kohima Smart City Mission atema senden ka ayongzüka agidang TR Zeliang-i ashi.
Smart City ya asenok Naga nunger asoshi tasen lir. Ajisüaka, asenok ajaki state yimtiba renlokdaktsütsü atema pei tajungtiba agi yariteptsüla, ta paisa ayongzük.
“Asenok ajak longjemer Smart City mapatong ya takok ngua inyakdi aser Kohima yimti tajung ka kümdaktsüdi. Kohima nung alirtem ajak aser talisa ali kiburtemi inyakba ajanga Kohima Smart City Project ya mapa küma inyaktettsü” ta chief minister-isa ashi.
“Kimung kar iba mapatong atema amshitsüsa ajurura, ali kiburtemi jenjang dalang agi kimungtemji yokdoktsüla. Public-i aginüba ama asenoki bendang magütsüra Smart City indang mapa nung tamakoktsü ajurutsü” ta TR Zeliang-isa shisem.
Senden nung Municipal Affairs Parliamentary Secretary, R Tohanba-ia o jembidang ashiba agi, linük ajunga nungi Smart City Mission atema yimti 98 shimtetba rongnung Nagaland yimtiba shimok.
“Asenok nem mangdang ka agütsüogo aser ibaji asangsang kümdaktsütsüji asenok dak dang keta lir” ta Tohanba-isa ashi.
Senden nung Nagaland Chief Secretary, Pankaj Kumar-i okila jembi aser pai ashiba agi, mezüngbo Smart City Mission atema senotsü telemsaji Centre aser State sorkartem tsüngda 50:50 liasü saka tang Centre-i North East nung aliba yimtitem atema akhi ama 90:10 asütsü telemtetba agiogo.
Senden nung mendenji Secretary Municipal Affairs, Maongwati Aier, IAS liasü, KMC administrator Kovi Meyase-i Kohima Smart City indang osang metetdaktsü, Head of Infrastructure Planning & Design, Voyants Solutions Private Limited, Gurgaon, Atreyee Mitra Aggrawal-i smart solutions indang osang lemsatep. Pa ya Kohima Smart City mission atema consultant lir.
Tatem nung Additional Director & HoD, Municipal Affairs, Nagaland Dr Toshimanen Ozukum-i anküp tepela o jembi.