Kohima Symphony Academy of Music kongsang tasembuba lapok

June 6, 2017 nü Tinpatti Kohima nung Naga nunger musician 6-i Symphony Academy of Music Kohima lapoktsüdang agiba noksa angur.

Kohima, June 6 (TYO): Kohima nung ‘Symphony Academy of Music’ indang kongsang tasembuba Tinpatti tesem nung lapokogo.
Iba kongsang ya PowerComm sannüker Messen-i meshiteta sarasademtsü aser Naga nunger musician 6- Yanpvuo Kikon, Sanen Kichu, Sunep Oz, Mhaseve Tetseo, Zubeni Kikon o Virie nungertemi lapok.
‘Symphony Academy of Music’ kiburji Mele Pucho lir aser pai osangbener den sensaksemdang ashiba agi, pa 2010 küm kidangi meyipa aruba sülen sempet aketba musician aika angu saka parnok sempet ajungkettsü atema sabang maliba anguba agi Kohima nung music school ka lapoktsü mulungtet.
Kentenba aser kongki atemba ya Tsüngrem nungi sempet tajung ka lir aser iba sempet ya Pa sentsüwangshi atema amshitsüla, ta Pucho-isa ashi.
Nagaland nung music education ajungkettsü aser music meimertem nem tesayuba agütsütsü atema pai mezüng school ji lapok, ta paisa shisem.
Symphony Academy of Music nung Director, Mele Pucho ya musician aser worship leader ka lir. Pa ya Harmonic Voices Nagaland nunga managing director den ano Event Producer ka lir.
Symphony Academy of Music Kohima ajanga guitar, piano, drum, vocal, cello, violin, bass guitar aser music theory indang course tem agütsür.