Kohima, October 11 (TYO) : Hokolbarnü Kohima jila tobur junga kümdaktsütsü onük jembitsü atema Hotel Japfu nung senden ka ayongzüka agi.
Iba senden ya Classic Club Kohima (CCK) aser Kohima Press Club (KPC) nati ayongzük aser Kohima Municipal Council (KMC) o district administration na dena lokti 11-i shilem agi.
Iba senden nung adenertemi Kohima jila nung mapa inyaktsü tebilemba aika lemsatep aser item rongnung, tongti tesem kar tobur junga yanglushitsü, kilentzü yimdokdak yanglutsü, gari lenmang raksa aliba nembanga aotsü, merükmeju mapa inyaktsü, süngdong atemtsü nungertem liasü.
Anosa, nübortem dang merükmejua alitsü osang prokshitsüba, gari amshirtemi lenmang nung jana mashi endokba anendaktsütsü, pressure group aser volunteers tentettsü, shishilembaba dokan shia naro ayutsü aser print o electronic media ajanga merükmejuba indang osang belenshitsü tebilembatem benoka olemtep.
Asen yimti merükmejua ayutsü mapang tongja tongogo anungji KMC-i merükmejuba aser metsümeshiba indang osangtem zülur Kohima tesem balala nung ayutsü, ta KMC administrator Kovi Meyase-i senden nung ashi.
Paisa ashiba agi, KMC-i pay & use toilet talila yanglutsü asr itemji atema ali nüngdaker.
Senden nung adener ajaki district administration den yaritepang aser Kohima jila tobur jungdaktsütsü atema tebilembatem lemsatepang, ta Kohima Additional Deputy Commissioner Lithrongla Tongpi-ia tesentepertem ayongzük.
SDO (C) Sadar Kohima Kethosituo Sekhose-i o jembidang Kohima DPDB-i traffic management system nung shilem agiba indang osang metetdaktsü.
Pai ashiba agi, anogoshia gari 18,000 shi kati PHQ junction adena senzür.
You must be logged in to post a comment Login