Kohima town nung tzü tajemtsü talila agütsütettsü

Kohima, April 06 (TYO): Nagaland yimtiba Kohima nung tzü agi kanga anüngba timtem koktettsü asoshi 2012 küm nungi tenzüka Public Health Engineering Department (PHED)-i tzü lenmang tasen bener arutsü tenzükba mapa renemtsü anasa lir aser iba ita nung yasa tzü talila yokba mapaji tenzüktettsü, ta tanü PHED minister-i tzü bener arudak Mima yimer lushi nung Zarü ayong semdangba mapang osangbenertem den jembidang metetdaktsü. Mima yim ya Kohima district nung Southern Angami kübok lir.
Tang ya Kohima nung alirtem asoshi anogo shia tzü litre million 11 nüngdaker saka tangbo anogo nung tzü litre million 1.5 dang agütsütetter ta paisa metetdaktsü.
Zarü ayong nungi Kohima town-i tzü mesüa bener arutsüba mapa ya 2012 küm tenzük saka senotsü mapang shitak nung magütsütetba ajanga mapa mapang shitak nung metemtet. Ajisüaka, joko mapa terenemleni arur aser iba ita nung yabosa atemtsüsa department nung inyakertemi kanga meranga inyakdagi ta paisa ashi. Iba mapa renemer külen Chief Minister Dr Shurhozelie Liezietsu nem lapokdaktsütsü tebilemba lir.
Iba tzü mesür aruba lenmang yagi kilometer 27 ajanger aser sen crore 46.73 endoka yangludagi. Iba mapa ya Center government kübok Urban Development Ministry nungi sen 90% agütsür aser state government-i 10% agüja inyaker.
Iba tzü bener aruba ya Zarü ayong nungi Pump ajanga tzüji atsütetter aser Kigwema yimtak reservoir yanglua yur yangji yimodaktsür aser iba nung jagi Kohima town kadang aluba Aradhura tenem kolak nung atsüngdena yudaktsür, idak nung jagi belenshir. Iba tzü ya kodang agütsü tenzükdir, idangjibo Kohima town nung anogo shia tajemtzü tzü litre million 3.8 angutsü.
Ano, tang bener arutsü alima tzü denji külemi department-i Phesama, Jotsoma aser Aradhura len nungi anogo shia tzü litre million 1.7 bener arusemtsü sentong ka inyaktepdagi ta PHED Secreatary, Moangwati Aier-i metetdaktsü.
Item mapatem ajakji renemer külenbo Kohima nung tzü nüngdakba 63% bo agütsütettsü ta paisa ashi.
Tanü Kohima town asoshi tzü mesür aruba ayong tashi oa semdangba mapang Chief Engineer PHED, Kevisekho Kruse-a dena liasü.