Kohima traffic atema sangdonger

Kohima, August 12 (TYO): August 15, 2019 nü Secretariat Plaza Kohima nung 73buba Independence Day amongtsü aliba dak sendakba nung security atema jila nung traffic ozüng tera melenshir, ta Addl. Superintendent of Police & PRO Kohima, Nagaland sangdong ka nung metetdaktsü.
CAR PASS ‘Z’ (Red) aser CAR PASS ‘Y’ (Blue) alirtem ang Secretariat Plaza telungi aitsü melatsü aser CAR PASS ‘X’ (Green) aliba garitemi peipei officers ji tongti Gate tashi meinoktsüba sülen Secretariat Complex kima anena ayutsü. Nüburtemi Secretariat Plaza tongti kima nung gari anena ayutsü akok.
August 15 nü anepdang 6:00 ako nungi two wheelers densema garitem item lenmang tiplen anena ayutsü memelatsü: BSNL Telephone Exchange nungi Classic Island tashi, Raj Bhavan nungi M.S Classic Island tashi, Classic Island nungi Razhü point adena Tinpati tashi aser Tinpati nungi Don Bosco Jn adena Billy Graham Road tashi.
Gari tulutem Tinpati Junction nungi Don Bosco Jn adena Assembly Secretariat tashi senzütsü amemelatsü. Sorkar department buses densema gari tulutemi Tinpati-High School-Merima-Secretariat road ajanga senzütsü akok.
Nüburtemi amalitepa inyaktsü imlar, ajisüaka tashi manger indang garitembo police-i atüer aotsü aser temenok senji gari kiburtem dang nungi meshitsü, ta kasa sangdong ajanga metetdaktsü.