Kohima Traffic Police-i aibelener aika apu

Kohima, June 14 (TYO): State yimtiba, Kohima nung traffic ozüng alema inyakba nokdangtsü atema tesüiba hopta ana tsüngda Kohima Traffic Police-i parking ozüng alema gari anena ayurtem aika apuba den külemi gari nung ozüng alema oset balala inokba puogo, ta PRO, DEF Kohima sangdong ka nung metetdaktsü.
Parking ozüng alema gari anena ayuba four wheelers 43 aser two wheelers 31 pua senchi achi. Iba dak alia gari nung ozüng alema oset balala inokba rongnung- Tainted Glass 175, Bull Bars 94, Flash Light/Blinkers 62, Modify asüba Silencer Pipes 2 aser Flag Post ka liasü.
Traffic Police-i maneni ozüng alema inyakertem aputsü, iba denji külemi onoki gari amshirtem dang ozüng kübok alitsü aser amaliteptsü mepishir, ta sangdong nung shia lir.