Kohima & Tseminyu police-i gari ka apu

Dimapur, June 3 (TYO) : Chiephobozou Police Station nungi police temi garitem mita reprangba mapang Hyundai Santro gari ka Kohima tsütsü nungi aruya aliba anendaktsü saka gariji Tseminyu tsütsüi jena ao, ta Sub-Divisional Police Officer & PRO, Kohima-i sangdong ka nung metetdaktsü.

Chiephobozou PS nungi police temi gariji arishi aser Tseminyu Police Station nem osang sangoktsü. Osang angazükba sülen Tseminyu P.S nungi police telok ka len tom nung mendanga ataa liasü aser Tseminyu jila nungi kilometer 1 shi pilar gariji apu, ta sangdong nung shia lir.

Ajisüaka, Hyundai Santro (NL07-3210) anir aser mena alirtemi gariji toktsür jena oadok aser police-i gari mita reprangdangdang, gari telung nung tesem balala nung Mc Rum bottle 345 miima bena liasü. Iba dak sendakba nung Kohima Chiephobozou P.S nung ken o ka benokogo aser maneni bushisüngdang südar, Kohima Police-isa metetdaktsü.

Hyundai Santro gari indang osang jangjatsü atema NCRB database nung bushidang NL07-3210 number ji DTO Dimapur ajanga Mahindra Bolero ka nem lemzükja aliba bushitet, ta parnokisa shisem.