Kohima & Mokokchung nung sanitation campaign tembangogo; Ungma, Aliba, Longkong aser Changki yimtsüngtemi sempet angu

Dimapur, November 1 (TYO) : Honibarnü Kohima Rural Division, PHED, Kohima nung 2015 atema Kohima district sanitation campaign tembangba sentong agi.
Senotsü peria monguaka State aser district ajak nung ita ka piyong sanitation campaign takok ngua agiogo, ta iba sentong nung Kohima Rural Division executive engineer, Er Jakphou Khiamniungan-i metetdaktsü.
Paisa PHE department staff aser yimtsüngtem den mulungtet teloktemi Kohima district nung shilem agiba atema tenüngsang agütsü.
Linük ajunga nung sanitation campaign ya September 25 nü Centre nung tenzük aser October 11 nü Jaya Prakash Narayan tasoba anogo nüngtem nung tembang.
Kohima nung agiba sentong nung SDO Chiephobozou Division, Er Mezhüvil Kikhi, SDO Tseminyu Div, Er Neirelie aser SDO Kohima Rural Division, Er Ruokuovituo Vizo nungertemi o jembi aser parnok ajaki nübortem dang merükmejua alitsü tayongzükba agütsü.
Sentong nung mendenji Rebecca, IEC consultant liasü, Vilasale, HA Tseminyu Division-i temoatsü meshia sarasadem aser Akho Neikha & medemertemi ken ka aten.
Mokokchung district nunga WSSO, PHED, Mokokchung division kübok September 25, 2015 nü iba mapa tenzüka liasü.
Ita piyong shilem balala lemsar agiyonga aruba sülen Longkumer Kilem nung nung tatembang sentong ka ayongzüka agi. Iba sentong nung Mokokchung Deputy Commissioner, Sushil Kumar Patel tongti tesemdanger liasü.
Sushil Kumar-i o jembidang PHED Mokokchung Division aser district nung aliba nübor ajak nem tenüngsang agütsü.
Nübortem iba mapa nung shilem agiba atema pelar aser iba merükmejuba inyakyim ya yimya sübatsüla, ta paisa ayongzük aser Watsan committee o village council züngsem ajak dang pelaba shisem.
Linük ajunga nung sanitation campaign nung küm nung ghonda 100 merükmejutsü nükjidong lir, anungji asen district tali merüka kümdaktsütsü asoshi nisung ajaki iba amaji inyaktsüla, ta Mokokchung DC-isa mepishia metetdaktsü.
Sentong nung tetushi süa jaokerji Mokokchung aser Mon atema Swachh Bharat Mission Brand Ambassador, Supongmeren Ex-MLA liasü aser paia Swachh Bharat Mission indang osang tejangja metetdaktsü.
Sentong nung Mokokchung district atema WATSAN committee award agütsü aser sub-division-1 nungi WATSAN Committee, Ungma, Sub-division-2 nungi WATSAN Committee, Aliba, sub division-3 nungi WATSAN Committee, Longkong aser sub-division-4 nungi WATSAN Committee, Changki nungertem sempet agizük.
Sentong nung mendenji Er.Yanger Pongen, Executive Engineer, PHED Mokokchung division liasü.