Kohima Village aser Tuensang Village na medemer yimtep

November 30, 2016 nü Kohima Village Council Hall nung Kohima Village aser Tuensang Village tambutemi nü melentepdang agiba noksa angur. 

Kohima, November 30 (TYO): Nagaland nung yimtsüng tulutiba rongnung ana- Kohima Village aser Tuensang Village na tsüngda medemer yimtepogo.
Iba sentong ya Kohima Village Council Hall nung agi aser Tuensang Village tenüng nungi C T Imlong aser Kohima Village tenüng nungi Sao Suokhrie nati nü songtepa, alima nung anü ali tashi yimtsüng ana medemer asütsü ta tenangzükba agitep.
Yimtsüng ana tsüngda tenangzüktep agiba atema sign süa ayuba dang masü saka nüngdakba mapang ajak nung yariteptsü aser Naga nunger loktiliba nung tatishitsü tajung ka ama alitsü bangzünga renem.
Tuensang Village tenüng nung parnok President, H Wongto-i o jembidang, “iba ya asenok yimtsüng ana atema dang masü saka asen kin ana atema apu tajung ka südaktsütsü” ta ashi.
Ano, Kohima Village tenüng nung Pheluopfhelie Kesiezie-i o jembidang, “iba tenangzüktep ya temulung taroktiba nungi agir. Yimtsüng ana tsüngda nü melentepba ajanga medemer yimtepba tamaitsü sayur” ta ashi.
Naga nungertemi temulungjang nungi melenteptsüla. Asenoki ochishiba, akhümtsübutep aser temeim lemsatep nungdang Nagaland nung temelenshi arutsü, ta Pheluopfhelie-isa ashi.
Naga Hoho kübok Naga nunger sabang ka nung longjema aliba loksaa aotsüsa mapang ka nung lir. Nagaland nung opposition maliba sorkar ka liaka, asen state tensa kanga mejungi lir. Ajak rongnung tamajungtibaji, Naga yimten teloktem aser lennirtem sabang ka nung melongjemtetba ya asütsü, ta sentong anir Vipralhou Kesiezie-ia metetdaktsü.
Naga loktiliba nung asenoki telemsa adokdaktsürtem anema noktaktsüla kechiyong iba ajanga asenok melongjemteter aser Naga loktiliba sama odaktsür, ta paisa shisem.
Tanü sentong nung Thepfulhouvi Solo aser N. Yemjong GB nati medemer yimtepba salem osang lemsatep, Medoselhou Keretsü-i tesentepertem pela agizük, Kohima Village Youth Organisation, Tuensang Village Students’ Union, Neisedenuo Zatsu aser Tuensang Village Folk Dance Troop nungeri ken aser yartsüngsangba ajanga shilem agi.