Kohima Village Youth Organization ajanga metetdaktsür

Kohima, Chiteni/July 31 (TYO): Kohima yimtiba aser temeket nung nüburtem kümzüka alitsü aser garitem tiptema jajatettsü mechi Kohima Village Youth Organization (KVYO) ajanga nüburtem dang meteta alitsü yimya kar KVYO tir, Dzüvinguzo Mepfhüo aser tongti zülur, Vizoneilie Pienyü nati sangdongogo, aser itemji:
1. Kohima telongzük nung gari tiptema jajatsü aser parking atema KVYO volunteers temi achayangtsü.
2. Yimtiba aser temeket nung anentsüh agi kongshia aliba tesemtem nung KVYO ajanga traffic police den yariteptsü.
3. Yimti nung süaka, municipal wards aser colony mesüra yimdak gari anenertemi lenmang amshir nem timtem magütsütsüsa anena ayutsü asoshi KVYO ajanga totuyuba agütsüogo.
4. Nüburtem jajaba lenmang nung gari driver mesüra kiburi tim masüba mapa inyakra KVYO-i tatok magütsütsü.
5. Gari ajaki (nija, shishilembaba, sorkar mesüra sepaitem indang garitem) traffic temzüng sülen anidaktsüla.
6. Medical emergency dak alaka gari katia tangar gari overtake masütsüla.
7. Senzüsembonger aser talisa school tanur anir senzürtemi traffic jam nung mapang talanglang alitsü ta meteta chiyongtsü aser tzü bener senzütsü ajungshir.
8. Lenmang teküpoklen aser tekalen jungjunga repranger gari anentsüla.
9. BRO/GREF aser state sorkari tekeratiba nung süoki ia raksar aliba lenmang anepalua yanglutsü ajungshir. Alimar yimyai bener arutsüba timtem paidoktsü makok, saka ketdangsürtemi senzüka yutsüba nungi timtem adokbabo tatok magütsütsü. Sorkari senzüka yutsüba nungi nüburtem akoksaa mesüra timtem ajurura süoki ia reprangtsü.