Kohima ya ‘Smoke Free City’ ka kümogo; State nung moko achir shilem 57 lir

April 28, 2016 nü Old MLA Hostel junction, Kohima nung ‘Smoke Free Kohima City’ campaign nung kaketshirtemi shilem agiba noksa nung angur.

Kohima, April 28 (TYO): Nagaland yimtiba, Kohima ya ‘Smoke-free city’ ka lir ta sangdongogo, iba den külemi Tobacoo Control atema District Level Coordination Committee-i nüburtem atema telatetba aser ozüngtem benoktsü.
Tanü Old MLA Hostel junction, Kohima nung Health & Family Welfare, District Tobacco Control Cell (DTCC) Department-i ayongzüka ‘Smoke Free Kohima City’ campaign alidang Kohima Deputy Commissioner, Rovilatuo Mor-i iba sangdong agütsü.
Iba campaign nung tobacco free school 22 nungi kaketshirtemi ‘Temelenshi ka adokdaktsüba ajanga naia nungiter ta sayuang’, ‘Cigarette masü calorie arongtsüla’, ‘Moko company temi customer tajungtem tepseter’ ta ozülu balala amer shilem agi. Parnokisa ‘Kohima ya moko machiba yimti ka kümdakjang’ aser ‘Tangu tajung agiang, pelaa liang’ ta yimyim ayim.
Kaketshirtem densema lokti senden nung Mor-i, Kohima ya Smoke Free City lir ta sangdong. Paisa Kohima ya moko machiba yimti ka akümtsü atema school 22 pronglai ambassador ama inyaktsüla ta ayongzük.
Iba dak sentakba nung kobi melii nüburtem atema telatetba aser ozüngtem den district ketdangsertem aser police teinyaktsütem metetdaktsütsü.
Tobacco free school 22-i temetetdaktsüba ka ajanga, school tanurtem moko ajanga kongshir ta shia ketdangsertem dang moko ajanga bener arutsüba timtem balala nungi tanurtem kümzükang ta mepishi.
Kasa temetetdaktsüba nung, India sorkari Kohima ya smart cities rongnung shimogo aser Health & Family Welfare Union Ministry-o Smart City shimtsü atema latettsüba rongnung ‘Smoke Free’ ya tongtibang onük ka asütsü benokogo, ta shia lir.
Okila jembidang Joint Director & State Nodal Officer National Tobacco Control Programme, Directorate of Health & Family Welfare, Nagaland, Dr H Hotokhu Chishi-i, linük nung moko achir timtiba aliba state tanabuba jenjang, Nagaland nung shilem 57 lir, ta metetdaktsü.
Tesasaba olen ka metetdakja pai, Nagaland nung school tanurtemi arishi küm 8 asüdangyongi moko achi tenzüker aser arishi küm 8-13 tsüngdapurtem shilem 28-i moko achir aser kasa purtem shilem 14-i moko meseper, ta ashi.
Pai ashiba agi, temejakba-mangemba moko nung chemical 4000 jungüa lir, item rongnung 28 bo cancer tashitak adokdaktsüba chemical lir.
Nagaland nung moko dak sentakba cancer tashitak kanga bulua kümdar; oral cancer, tekolak aser tekong cancer, terok cancer aser tepok cancer bulua akumer, ta paisa ashi.
Iba dak sentakba nung Dr. Chishi-i, “Moko achiba ajema kümdaktsütsü aser asen chirtem moko ajanga timtem balala agütsüba nungi kümzüktsü atema asenok longjemer inyaktsüla,” ta ayongzük.
Mount Sinai Higher Secondary School aser Government HSS Seikhazou na nungi kaketshir anati ‘Mok ajanga tema nung timtem agütsüba’ ‘Kohima nung nung moko mamshitsü atema kü mangdang’ onük nung jembia liasü.