Kohima yimti ‘WiFi City’ akümtsü maparen tenzükogo

Kohima, December 01 (TYO): Benjung mongpu atongba den külemi state yimtiba, Kohima ya WiFi city ka kümogo; kechiyong November 30, 2019 nü RCEMPA Jotsoma nung Urban Development Advisor, Dr Neikiesalie Nicky Kire-i official süa iba sentong tenzükja liasü, ta ketdangsertem osang ka ajanga metetdaktsü.
Smart City project kübok Kohima WiFi City atema tang ya mezüngbuba shilem lir, aser iba ya Kohima Smart City Development Ltd aser IT&C Department Nagaland nati longjemer inyaker.
Iba sentong nung jembidang Advisor for IT&C, Science & Technology and NRE, Mmhonlumo Kikon-i, mezüngbuba WiFi hotspots ji Kohima Science College aser RCEMPA Jotsoma nung tenzüker aser iba sülen Kohima nung PHQ junction areas, Mission compound Kohima Village, Heritage, Law college, High school, Local ground area aser tanga tesemtem nunga WiFi hotspots tenzüktsü aser iba osangji Kohima Smart City-i sangdongtsü, ta metetdaktsü.
“Onoki PHQ junction aser Phoolbari junction nunga interactive kiosks ana amenoktsü, koba ajanga sensotem aser raliwalirtemi yimti indang tongtibang osangtem metettsü aser emergency services den metetpelatettsü,” ta paisa metetdaktsü.
“Kohima ya WiFi powered city atema tanü mezüngbuba shilem tenzüker, koba ajanga asen loktiliba ya digital ajanga tashi agütsüba lokti ka akümtsü, aser oda-odabo e-Democracy akümtsü,” ta Kikon-i shisem.
Advisor-isa, angati WiFi connectivity ji ita ka atema asütsü, iba sülenbo jenjang dalang agi agütsütsü, ta metetdaktsü.