Kohinoor Diamond ji UK meyong: Sorkar

New Delhi, April 18 (Agencies): “India-i nüngtugu Kohinoor diamond memeshitsüla, kechiyong ibaji auyaba masü mesüra tashiyim amshia agiba masü,” ta Hombarnü Centre sorkari ashi.
All India Human Rights and Social Justice Front-i Kohinoor diamond den Tipu Sultan indang küri aser noklangnok densema nüngtugu nüngo osettem United Kingdom-i India nem meyiptsütsüla ta Supreme Court dang temepishiba ken o ka benoka lir.
Kohinoor tetezü, ‘Mountain of Light’ lir, aser ibaji Putu 19 mapang Punjab yimsüsür, Maharaja Ranjit Singh-i Afghan Chuba ka dang nungi angu. Pai ibaji Odisha nung aliba tekülem ki ka nem agütsütsü atema pa indang senmang nung zülua yutsü, saka pa menden melenzüksang tanubor, Dilip Singh-i 1849 küm diamond ji East India company nem agütsü, ta India sorkari ashi.
Iba diamond ji Queen Victoria korang nung inok, aser tang Tower of London nung yua lir.
Küm aika yimtenren lenirtem densema aikati India aser UK nung, “British India yimli küboki Punjab aitba sülen iba diamond rakzük, anungji ibaji meyiptsütsüla,” ta jembia arur.
Iba ken o nung densema aliba Foreign Ministry-ibo parnok tangatetba mebenoki lir. SC obendangertemi Centre dang hopta trok tsüngda telangzüba agütsütsü tuyua lir.
2013 küm India semdangba mapang NDTV den jembidang UK Ato kilonser, David Cameron-i, “Nenok terepranger ajak mepelatsüsa ni ya sasaseta ashir, ibaji (diamond) UK nungi mainshitsü,” ta ashi.
Daily Mail ajanga ashiba agi, “Kohinoor aliba korangji tamarentsürtemi dang asemer, kechiyong ibaji teburtemi semra tai makar.”
Prince Willian kinüngtsü Kate Middleton queen consort kümra, lai diamond keta aliba korangji official sentongtem nung asemtsü.
Taoba hopta Supreme Court nung iba ken o angadangba mapang sorkari, India nüjiso mangudang nüngo osettem bener aobaji meyipa bener arutsü küm 43 tain ozüng ka ajanga memelar, ta shia liasü.
Koh-i-Noor ya 106 carats diamond ka lir, aser mapang ka nungbo alima nung diamond tulutiba liasü. Iba diamond ya tang British tamarener kibong ket nung lir.
Akhi otsü ajang ashiba agi iba diamond ya küm 5000 tain lir aser Sanskrit kakettem nung iba dang ya Syamantaka jewel ta jaa lir.