Kohli-i umpire decision magizükba ajanga senchi achi

New Delhi, February 28 (Agencies) : Mirpur nung Asia Cup T20 Pakistan den asayaba mapang India nunger cricket asayar tajungtiba rongnung ka, Virat Kohli-i ‘ICC Code of Conduct, Level 1’ kübok aibelenba ajanga Deobarnü pa indang match fee nungi noklang nung shilem 30 senchi achi.
“Pai ICC Code of Conduct Article 2.1.5 mezüngmeshia amshi. Pai umpire decision nung mulung machi sayu,” ta ICC-i ashi.
“Iba ya India nunger batting asüba mapang over 15 buba nung atalok. Kohli nem LBW agütsüba sülen mezüng pai pa indang bat sayu aser ano pitch nungi tugodang umpire sang meyipa achia o tamajung kar nemnema ashi,” ta ICC-isa ashi.
Kohli-i Deobarnü pai aibelenba nangzükogo aser ICC Match Referee tem indang Elite Panel nungi Jeff Crowe-i kazüka yokba senchi agütsütsü mulunga agizük, ta ICC ashi.
Iba tebilemtsü ya umpire Ruchira Palliyaguruge aser Sharfuddoula, third umpire Enamul Haque aser fourth official Anisur Rahman nungeri benoka liasü. Mezüng aibelenertem atemabo temerenshi ajema agütsür aser senchi timba agi match fee nungi noklang nung shilem 50 tashi achir.
Kohli-i iba asaya nung runs 49 yanglua liasü.
Mohammad Sami-i ball aonba mapang Kohli-i bat agia terabo zükshir amai sür nung pa nem LBW agütsü.

You must be logged in to post a comment Login