Kokrajhar nung nisung 3 light current agi poseta asü

Kokrajhar, Yimpoksüi/November 7 (Agencies): Tetsür ka densema nisung asem tashi Kokrajhar district kübok Sangtennü nikongtsütsü tesem balala nung light current agi poseta süogo. Iba tatalokba ajanga yimdaklirtem mangyim tia nung toktsüogo.
Mezüngbuba tatalokba ya No 14 Bishmuri yimtsüng nung atalok. Iba tatalokba nung electricians ana asü, shirnok yimdak phase tasen connect süa aliba mapang nung current ajungbena arua apu. Iba tatalokba ya nikongtütsü 6:00 ako shi nung atalok.
Electrician ana ya Kokrajhar district kübok Samokaguri yimtsüng nungi Swmkwr Basumatary (25) aser Raju Basumatary (20) ta jangjaogo. Tena ya No-14 Bismuri yimtsüng nungi Lakipur yimtsüng tashi electric inzü tasen mesangba mapa nung sodaka inyaka liasü. Electrician ana ya sub contractor Samar Basumatary kübok taoba küm pongu tashi inyaka arua liasü.
Iba tatalokba sülen Swmkwr aser Raju na Kokrajhar RN Brahma Civil Hospital-i anir aru saka tena tasü bener aru ta sangdonga liasü. Asür ana tasümang post mortem Rasemnü Kokrajhar nung agiogo.
Iba tatalokba sülen nüburtemi Samar Basumatary dak azük. Osang ajanga ashiba agi, Rajesh Singh meyong ‘ENN-AAR Company and Poles’ nem iba mapa agütsü aser Samar Basumatary nem sub contractor ka ama iba maparen achaayangtsü asoshi nongloktsü.
Osangbenertem den sensaksemba mapang Samar Basumatary-i ashiba agi, Sangtennü yimdaklirtemi kangshia electrician ana dang power line mesenteptsü asoshi ashi. “Yimdaklirtemi kanga nongshiba ajanga tenati power connect sütsüsa aküma aser iba lendong ya atalok.”
Tanabuba tatalokba nung Jaoliapara, Duramari nungi Billal Ali Sheik kinungtsü Anjana Bibi (22) Sangtennü nikongtsütsü light current agi poseta asü. Iba yimtsüng nung tawang light connection agütsü aser yimdak iba maparen tang tinyakdak lir.