Kolkata-GHY tayimtsü poksatsütsü amokmeren

Kolkata, September 20 (Agencies): Tanü phone call ka ajanga Air India tayimtsü bomb agi poksatsütsü ta amokmerenba ajanga Kolkata nung aliba Netaji Subhas Chandra Bose International Airport nung security sepaitem aoksatepogo.
Mejangjaba nisungtemi phone ajanga, tayimtsü nungji bomb ka yuja lir ta ashiba ajanga Kolkata nungi Guwahati-i aotsü aliba tayimtsüji ghonda ana shi menur ang apusoa liasü, ta airport ketdangsertemi ashi.
AI-729 tayimtsü nungji passenger 114 mener tanep 9:50 ako nung Kolkata nungi Guwahati-i apusotsüba liasü.
Ajisüaka tayimtsü apusotsü mapang tatsüka dang lia airport duty manager dangi tetsür ola kati phone ajanga pa dang tayimtsü nungji bomb ka yuja lir ta metetdaktsü, ta ketdangsertemi ashi. Idangyongjisa tayimtsü nungi passenger tem aludakja tayimtsüji isolation bay-i anir ao. Iba sülen security aser bomb squad sepaitemi tayimtsüji mita bushi saka kecha mangu.
Tan ita, tang agi anaben tashi tiyazü nung phone ajanga amokmerenogo. September 7 nüa iba airport poksatsütsü ta phone ajanga asemben amokmerena liasü.
Anogo ananü lir ano phone call ka ajanga state secretariat, ‘Nabanna’ poksatsütsü ta amokmerena liasü.