Kolkata-i aoba train ka agi gari dak atsük, nisung 5 asü

Dhaka, January 08 (Agencies) : Deobarnü Kolkata-i aoba Indo-Bangladesh Maitree Express train ka gari ka den tsüktepdang kibong ka nungi nisung pezü dena parnok nisung pungu (5) asü, ta osangbenertemi ashi.
Iba lendong ya Deobarnep Dhaka anasa Gazipur district nung 10:00 ako meta atalok, ta police ketdangser kati ashiba Xinhua news agency ajanga metetdaktsü.
Shingaia acha ayang masüba tesem ka nung iba gari ya train lenmangji ajangdanga aotsü merangdang gari tetsüngji train lenmang nung asongoka ayu aser ibaji ajanga Dhaka nungi aruba Indo-Bangladesh Friendship Express den tsükteptsüsa aküm, ta kasa ketdangser jagisa shisem.
Mezüngbo iba gariji mini-bus liasü, ta osangbenertemi metetdakja liasü.
Train ji kanga mejungi raksa ajisüaka train nung mena aliba nisungtem ka tanga meyiru. Iba lendong atalokba ajanga Bangladesh tesem kar nungbo train mejajai anena liasü, ta police ketdangser jagi ashi.
Bangladesh nung train lendong atalokbaji züngdangra tanga linüktem dang nungi timba ataloker.
Linük nung shingaia acha ayang masüba train lenmang ajangdangba tesem aika lir aser item tesem nung aliba train lenmangtemji gari mejajatettsüsa raksar lir. Ibaji ajanga iba amala mesükba lendong aiben ataloker, ta osangbenertemi ashi.