Kolkata lendong nung asür 24 jungogo, IVRCL ketdangser 5 apu

March 31, 2016 nikongdang Kolkata, Vivekananda Road nung flyover ka chirepdang  anenbangba truck ka noksa nung angur. (Kolkata, April 01 2016).

Kolkata, April 01 (Agencies): Yashi nikongdang Kolkata yimti nung flyover ka chirepba lendong nung asür 24 jungogo aser ketdangsertem den NRDF team temi maneni apu chirepba telung nung akümlirtem bushidar.
Asürtem 24 jungogo aser maneni apu chirepba telung nung nisung 100 dak tema alitsü südi ta ketdangsertemi bilemer.
Tanü National Disaster Response Force (NDRF) DIG, SS Guleria-i, apu chirepba agi anenbanga alirtemi taküm malitsü südi, saka akumlirtem maneni atsüteta kümzüktsü atema onoki merangdar, ta ashi.
Army ketdangsertemia, “Tang tongtibangba mapaji lenmang lapoktsü atema apu chirepba agientsü aser lenmang merüktettsü lir. Hokolbar anepdang tashi nungbo jana nungi tasümang mangutsü südi ta bilemer,” ta ashi.
Brihostibar aonung piyong army rescue team temi civil defence, police aser NRDF den külemi yaritepa apu chirepbaji agientsü atema inyak.
Army maparen ajakji General Officer in Command of Army’s Bengal area, Lt Gen Rajeev Tewary leniba nung inyakdar.
Apu chirepba tesem nung medical team, doctor tem, engineer tem aser gas cutter tem densema army noklang 300 dak temai maneni inyakdar.
Iba lendong ya kanga tia maka ta shia yashi IVRCL nung infrastructure major-i, iba tatalokba ken o bushisüngdangba nung parnoki state ketdangsertem den yariteptsü, ta shiogo.
Infrastructure major-i, “Nisung asüba aser yiruba atema IVRCL-i mangyimer, aser onoki iba tatalokba bushisüngdanger ketdangsertem den yariteptsü,” ta ashi.
Kolkata nung Vivekananada Flyover project ya IVRCL-i teyangludak liasü.
Iba tatalokba dak sentakba nung police-i IVRCL ketdangser pongu pua lir, ta osang ka ajanga ashi.
Iba tatalokba ken o ya CBI nem bushidaktsütsü atema temepishiba ka benoka lir, iba den külemi IIT Kharagpur nungia mongintem densema bushidaktsütsü mepishia lir.
Girish Park nung aliba flyover chirepba ken o nung Calcutta high court nung temepishiba benokba nung takhangbatem rongnung- IVRCL company nungi quality certificate meshitsü, company jagi kmda nem apu Planning agütsüba aser high court-i achaayangba  kübok bushisüngdangtsü atema committee ka tentettsü densema lir.