Kolkata mozü dokan nung sen 500 senpak magiba ajanga lanur ka asü

Kolkata, November 18 (Agencies) : Sen 500 aser 1000 senpaktem mamshitsü metetdaktsüba sülen yimti nung sen agi anüngba tensa ka nung, Hokolbarnü Kolkata mozüki ka nung anepaluba lanur ka dang nungi mozü ayokba dokan ka nung sen 500 tejenba magiba ajanga nüngdakba mozü maliteti asü.
Arishi küm 16 tain, Siba Das Brihostibarnep temang kanga arongba agi RG Kar Medical College & Hospital emergency department-i anir ao.
Yangji aliba mozü ayokba dokan ka nung shirangsang atema ‘duct tape’ alidang sen 500 senpak tejenba magi. Par kinungertem ket nung sen tanga maliasü.
“Ni shirangsang atema sen 180 alanga duct tape alitsü nüngdaka liasü. Shirangsangji tasü taküm tsüngda liasü, ajisüaka mozü ayokba dokan nung sen 500 senpak tejenba magitsü ta ashi,” ta iba asür kinunger Sambhu Das-i ashi
Sorkari item senpaktem joko magitsü ta sangdongaka shirangertem yaritsü atema mozüki aser mozü anguba tesemtem nungbo item sen agizüktsü metetdaktsüogo.
Aji oda süaka mozü ayokba dokan kibur jagi ashiba agi, mozü alitsü aruba mapang sen tanük maliba agi mozüji bener oa atar sen khen lir bener arujang ta ashi saka shirangsanger kinungertemi manga.
“Parnok dokani aruba mapang onok ket nung sen 500 tanük maliasü. Anungji parnok dang nüngdakba osettem bener oa atar sen khen lir bener arujang ta ashi. Ajisüaka parnoki memulung,” ta Kamala Medical Store kibur Tushar Kanti Ghosh-i ashi.
Brihostibar nikongdang tasüngsanger kinungertemi RG Kar hospital jakdang iba tatalokba dak sendakba nung longkak aita liasü.
“Iba mozü ayokba dokan anema police station nung ken o benoktsü,” ta asür kinunger rongnung kati ashi.