Kolkata nung Assam tsür ka tashiyim agi raksatsü

Guwahati, April 05 (Agencies): Guwahati nung kaketshir tetsür kati ashiba agi, Kolkata nung amenloker aliba shishilembar kati city guest house nung la dak aiben tim mesüi benshia liasü, ta osang ajanga metetdaktsü.
Osang ajanga ashiba agi, tetsürla ya yaküm ‘cosmetology’ azüngtsü asoshi Kolkota-i arua liasü. La yimti south tsütsü ki ka nung lia liasü.
Tetsürlai ashiba agi, lar medemer ajanga Kolkata nung amenloker aliba shishilembar Rakesh Chowdhury den la metettepa aküm. Chowdhury ya kibong kümer aliba nisung ka lir, aser pa Salt Lake tesem nung alir.
Yaküm June ita yimti nung restaurant ka nung la Rakesh Chowdhury den ajurutep, aser pai la nem yi tajemtsü agüja liasü. Tetsürlai ashiba agi, yi ajemba sülen la süchia oa. Iba sülen Rakesh-i la city guest house-i anir orr idakji la dak tashiyim mapa inyak.
Rakesh Chowdhury-i tetsürla dak tashiyim mapa inyakba tangoka ayu, aser online nung iba video prokshitsü asoshi amokmerena liasü. Yaküm June ita nungi tenzüka pai tetsürla dak aiben tashiyim mapa inyakogo.
Kaketshir-i ashiba agi, la anaben tashi tanur aben aser Rakesh Chowdhury-i tashiyim agi anapronglaji raksaa indoktsü.
Brehostibarnü tanutsülai Lake Police Station nung Chowdhury aser kinungtsü anema ken o ka benoka liasü.
Iba ken o angazükba sülen IPC section tem kübok police-i bushisüngdang tenzükogo, ta police nung ketdangser kati osangbenertem dang ashi.
Police nem osang agütsüba sülen nungi Chowdhury aser kinungtsü na jenogo, ta osang ajanga metetdaktsü.