Kolkata nung flyover ka chirep;nisung 22 asü

Kolkata, March 31 (Agencies): Brihostibar nikongdang West Bengal yimtiba, Kolkata nung tang teyangludak ‘flyover’ ka chirepba lendong nung apu teküboklen alir nisung aser gari anenbanga iba lendong nung tajemba agi nisung 22 asü aser nisung 150 dak tema yiruogo, Hindustan Times osang ajanga metetdaktsü.
Iba apu ya Girish Park anasa lir. Merang aser cement agi yangluba metre 100 talang apu agi anenbangertemji anasa alirtemi teka tesa agi kümzüktsü meranga liasü.
Left wing party otongdar, Derek O’Brien-i twitter ajanga, “Monumental lendong. Kümzükba maparen inyakdar. Nisung aika sür südi,” ta metetdaktsü.
Ano Chief Minister, Mamata Banerjee-a iba tesem jagi ilonga aoba sülen tensa reprangdangogo, aser iba dak sentakba nung osangbenertemi la dang, apu chirepba ya shirnok tai ajanga (?) ta asüngdang.
Yaküm November ita nung osangkaket ka ajanga ashiba agi, Banerjee-i iba  project ji February nung tembanga inyakdaktsünüa liasü. Ajisüaka Project engineer temi, ibaji takoktsü mapa ka masütsü ta tebilemtsü kaa liasü.
Television noksa nung, merang aser cement meyoktepa yangluba ‘slab’ agi anenbanga aliba nisung ka teka nung azü agi melangar adoka angu aser nisungtemi anenbanga alirtem nem tzü pongdang agütsütsü merangba noksa lir.
“Merang aser cement agi yangluba ‘concrete’ ji yasüng tesü apu nung iba tesem nungji inoka liasü,” ta yangji alir nisung ka tenüng agi Ramesh Kejriwal-i osangbenertem dang ashi.
Police ketdangser kati, kümzüka alir rongnung kanga mejungi yirua alir nisung 15 lir, iba den külemi yiru alir nisung 78 Kolkata nung aliba Medical College Hospital-i anir oa yaridar, ta metetdaktsü.
Ton 140 crane ka iba tesem jagi bener aru, ajisüaka merang aser cement agi yangluba concrete slab ji ajunger matutet. Slab jagi nisung aika anenbanga lir, aser parnok rongnung minibus ka nung passenger tem densema lir.
Kilometer ana talang Vivekananda Road flyover ya 2009 küm nungi yanglur aser ibaji renema inyaktsü atema atemzükba mapang aiben süidakja aruogo.
Akhidang nungi India nung construction project tem ya ‘safety standards’ nung aliba ama meinyaker aser yimtenren lenirtem o business na tsüngda tesentaktep junga makai inyaka arur.
Iba lendong ajanga West Bengal assembly election nung kongshitsü akok ta bilemer.
Indian company IVRCL (IVRC.NS)-i Vivekananda Road flyover ya yanglur.