Kolkata nung tashiyim agi tetsür raksatsür asem aitsüogo

Kolkata, December 10 (Agencies): Küm pezü tejaklen Kolkata nung arishi küm 37 tain, Suzette Jordan, tebur pongui tashiyim agi raksatsüba ‘Park Street rape case’ dak sentakba nung parnok asem dak tai puteta aitsüogo.

Par pongu rongnung tongti nisung ana Kader Khan aser Ali nabo tang tashi jenshidar.

Iba lendong nungi taküm kümzüker alila, Suzette Jordan ya tekolok meyiba tesü nung timtem adoka (meningitis) taküm March ita nung iba lima nungi pilaogo.

Additional Sessions Judge Chiranjib Bhattacharya-i, Ruman Khan, Naser Khan aser Sumit Bajaj nunger dak tai lir, ta metetdaktsüogo.

Iba lendong ajurudang arishi küm 37 liasüla, kongro Jordan ya February 5, 2012 aonung tebur pongui ‘night club’ ka nungi parnoki meinoktsüdi ta ser anir oa ‘Park Street’ tesem nung tashiyim agi raksatsü. Iba sülen anogo ishika lir lai police dang tatalokba ashi aser iba mapang chief minister Mamata Banerjee-i iba tatalokbaji otsü yangluba ka dang lir ta shia liasü.

Aji oda süaka police ketdangser Damayanti Sen-i iba ken o kanga junga bushisüngdangba sülen tai inyaker parnok pongu jangja aküm. La ya mapa nungia anentsü saka la dak tashiyim inyaker asem pua aru.

Iba ken o ya 2013 küm nungi angadangtsü tenzük. Pua alir parnok asemi CCTV nung parnoki inyakba tejangja sayuang ta akhangba ajanga Hyderabad-i bushisüngdangtsü yok aser ibaji ajanga iba ken o talangka anena ayu.

Pua alirtemi iba ken o teyazü ta ashiba ajanga iba tatalokba dak sentakba nung ita trok tashi Jordan temang tendanga liasü.