Kolkata: Satyajit Ray institute nungi nisung pongu aridok

Kolkata, August 18 (Agencies) : Satyajit Ray Film & Television Institute (SRFTI)-i yangji azünger parnok nisung pungui yimya tamajung benshiba ajanga teraksa aser maksü bentsür aruogo ta temulung melemi bilema par institute nungi aridokogo, ta Registrar-i metetdaktsü.
Iba institute-i ashiba agi, item nisung pongu dak parnok tuluba ama bilemba shisatsü aketba ajanga institute indang mezüngbuba gate nung inoka aliba CCTV camera tem raksatsü aser yangji aliba tanükertem dena tim masüba yimya agi jembishinüa merenshia liasü.
Parnokisa August 11, 2017 nü security office telung ia bensatsü aser parnoki inyaksangshiba tangar nem memetetdaktsü aser kuli ka danga mongudaktsütsü mechi nung security office nung aliba computer indang Hard Disk dena agizüka bener ao, ta institute sangdong nungji shia lir.
Iba tatalokba ya Dean’s Council nem metetdaktsüogo aser council nung züngsemtemi iba tim masü mapa asoshi mera takhang agiogo, ta Hokolbarnü institute registrar B.D.M. Ambedka-i ashi.
Item nisung pungu ya telemtetba tajung ka dangi maru tashi institute nungi aridokba sülen parnok aliba hostel takdangtem Hokolbar anüngdang tashi nungbo azüngtetjang ta parnok dang metetdaktsüogo.
Iba dak sendakba nung par pungu anema police complaint ka benokogo, ta ketdangsertemi ashi.