Kolkata shishilembadak mi adok, nisung ana rongset

Kolkata, Aenjeti 22 (Agencies): North Kolkata indang Dum Dum area nung aliba shishilembadak tesem nung Tentonü mesangwajungi mi adok, aser iba mi lendong nung nisung ana rongset, ka samar bushir aser aika yiru.
Iba mi ya dokan 500 jungnüa nung kaolok aser item rongnungi dokan 150 dak tali kicha manüngi rongdok. Iba mi ajangasa nationalised bank ka indang branch ka densema rongdok.
Iba shishilembaba tesem nung Saraswati Puja asoshi oset tali bendena aliba ajanga tesama ya sen crore aika jenjang alitsü, ta shishilembartemi ashir.
Mi adokba ya mezüng Dum Dum nung tejentiba aser mazüngtiba shishilembaba tesem, Gora Bazar nung anepdang 1:15 ako meta metet. Iba temesü tesem nung mi lendong nungi kümzüktsü asoshi asameyang maliba ajanga mi ya kanga kera asemshia ao. Iba tesem aser temeket nung osettem rizünga aliba ya timba mi kaoloktsü temela asüba ajanga tensa tamajungba aküm.
Mezüngbo mi remsepba gari 22 yok. Iba tesem nung aliba police aser disaster management ketdangsertemi mi jangrua aliba building ka nungi nisung asem kümzüktet aser iba mi remseptsü asoshi ghonda 11 shi agi, ta osang ajanga ashi.
Iba tesem nung lenmang temesü aser ozüng alema ali agilokba ajanga mi remsepertem sadema mapa meinyaktet.
Fire-fighter tem yaritsü asoshi tzü abenba gari tali yoksem aser temeket nung aliba nisungtem kümzüka alitsü mechi parnok aliba tesem nungi anien, ta ketdangser osang ka ajanga ashi.
Iba kitsük-kirong lendong nung asür ana ya Sunil Sahu aser Vocky Jha lir, ta jangjaogo aser samar alisang ya Mohammad Nur alitsü, ta kasa osang ajanga ashi.
Sunil ya lemtamatar ka lir aser pa ya iba tesem nung chiyongtsü ayoker, aser Vicky ya pa teyarir ka liasü. Iba lendong nung ketdangsertem karbo yiru, ta police temi ashi.
Iba kitsük-kirong lendong tenzükba indang kuli bushisüngdang tenzükogo, ta parnokisa metetdaktsü.