Kolkata slum ki 200 nung solar ajanga tesangwa agütsütsü

Kolkata, February 23 (Agencies): Kolkata slum nung aliba ki 200 shi nung Mongulbarnü nungi kilem nung amendaka yutetba anü tashi atsüba oset ajanga tesangwa agütsütsü, ta sangdong ka ajanga metetdaktsü.

Renewable energy nung mongin aser anü nungi tesangwa kija atsütsü oset yanglutetsang S.P. Gon Chaudhuri-i ashiba agi iba oset nung photovoltaic cells mali yonga mapa inyaker.

“Iba oset yagi anüngdang anü nungi tesangwa atsüzüker aser kilem nung kanga junga amendaka yuteter. Iba oset yagi tesangwa agütsübaji 100-watt bulb ka shi lir koba agi slum nung kangasa ammang tesem nung tesangwa agütsübaji kanga jangaja metettsü,” ta Gon Chaudhuri-i IANS dang ashi.

“Anü atsüzükba oset, solar pipe nung ya sentsü ka nülokja lir,” ta ashidang pai, iba oset yagi electric masü saka tesangwa dang agütsür, ta shisem.

Iba technology ya Kolkata anüdoklentip tsütsü Topsia tesem nung aliba slum tem nung amshitsü asoshi pa dang West Bengal sorkari mepeshia asüngdanga liasü.

“Tesüiba mapang nunga ni iba technology ya New Delhi aser Kolkata yimti tesem kar nung amshidangogo. Iba ‘8 by 12 inch’ oset ya sen 475 agi ayoktsü aser ajaki mela mela amshitettsü. Iba oset nung kecha yanglushitsü mesüra anepalutsü tenüngdaktsü mali,” ta pai ashi.