Kolkota nung train senzüsenpong mesademer

Kolkata, Monupii/May 21 (Agencies): Eastern Railway Sealdah division nung Mongolbarnü densema anogo anabuba train services dak kongshir lir. Longkak aitertemi train lenmang mokdangba ayuba aser Bhatpara nung TMC aser BJP pusemertem maneni mangatettep adoka aliba ajanga iba timtem adokdaktsüogo.
Iba tesem nung tenokdangba agütsür aliba mangai, mejangjaba nisungtemi Kankinara railway station kima crude bomb ka pokloktsü, saka iba lendong nung shinga miyiru, ta police ketdangser kati ashi.
Iba lendong atalokba sülen train nung senzürtem aser local nisungtem jenshiba nguogo aser kasa mapang nung ozüng alema inyakertem hadir balala bener iba tesem nung sentepba nguogo.
Eastern Railway otongdar kati ashiba agi, Mongolbarnü train mokdanga ayuba ajanga local aser express train aika athitsüsa aküm aser iba ajanga nüburtem nem timtem agütsüogo. Train ya anepdang 8:43 nungi 12.04 tashi mokdanga ayu.
Deobarnü bypoll mapang BJP aser TMC pusemertem tsüngda Kankinara nung mangatettep adokba sülen mepetmesü adoka liasü. Bhatpara, ya taoba TMC MLA Arjun Singh tamendakdak lir.
Osang ajanga ashiba agi, bomb tem TMC office nung pokloktsü aser mi senoka rongtsü. Iba sülen central force temi tensa azüoktsü atema ozüng raksartem lathi agi züka mein.
Iba mangatettep adokba nung nisung 14 yiru aser iba den dokan aser ki aika raksaa liasü.
Election Commission-i Hombarnü Bhatpara nung Section 144 CrPC benoka liasü.
Barrackpur police commisionerate, Deputy Commissioner (Zone I) K Kannan-i ashiba agi, Deobarnü Bhatpara nung mepetmesü adokdaktsür nisung 70 pua lir.
Kasa mapang nung election tembangba sülen mangatettep adoktsü ajema central force company 200 maneni May 17 tashi West Bengal nung inyaksangshitsü atema sota lir.
TMC MLA Arjun Singh BJP nungi Barrackpore nung Lok Sabha election tokteptsü atema MLA menden toktsüba sülen North 24 Paraganas district nung election agishitsüsa aküm.
BJP puri par jabaso Pawan Kumar Singh TMC candidate Madan Mitra den tokteptsü asoshi yok.