Kollam nung tekülem ki mi lendong nung nisung 110 asü

Ato kilonser, Narendra Modi-i Kollam District Hospital-i oa yirua alirtem semdangba noksa nung angur. Ajichilen noksa nung lendong atalokba tesem, Puttingal Devi tekülem ki anasa nisungtem adenshia aliba angur. (Kollam, April 10, 2016)

Kollam (Kerala), April 10 (Agencies): Kerala yimtiba, Thiruvananthapuram nungi kilometer 60 shi pilar aliba Kollam district anasa aliba Paravur Puttingal Devi tekülem ki nung Deobar anepdang 3:30 ako meta mi lendong nung tajemba agi nisung 110 asü aser nisung 350 dak tema yiruogo.
Tamangba yimsü dak sentakba sentong, ‘fireworks’ alidang fireworks oset ayuba storehouse nung mi üplokba ajanga tapoktsü poka mi lendong tulu atalok. Lendong atalokba sülen tekülem ki ketdangsertembo atsükogo.
Iba lendong nung yirur aika mozüki matongdangsa asü aser tang Kollam nung aliba district hospital nung yirua alir nisung 100 dak tema yaridar. Ano yirua alir karbo Thiruvananthapuram Medical College Hospital aser Kollam nung aliba mozüki balala nung yaridar.
Storehouse nung tapoktsü apokba ajanga iba anasa aliba Travancore Devaswom Board indang office poksaa chirep.
Mezüng bushisüngdang ajanga ‘fireworks’ aliba mapang storehouse nungji misem üplok, ta bushitetogo.
Tanga osang ka ajanga ashiba agi, iba kiyong nung alir nisung kati tekülem kidang fireworks sentong agitsü atema temelaba magütsütsü asoshi Paravur police station nung temepishiba ka benoka liasü, aser iba nungji ajemdaker police-i district ketdangsertem dang tekülem kidangji iba sentong makatsü atema temelaba magütsütsüla, ta shia liasü.
Tamangba yimsü benjungtem nung bomb amshiba ya state nung tang tasen ka masü, ajisüaka tesüiba küm 50 tsüngda state otsü nung tanü atalokba lendong ya tulutiba lir.
1952 küm Sabarimala Lord Ayyappa tekülem kidanga fireworks lendong nung nisung 68 asü, 1984 nunga Thrissur  nung Arogo benjung ka nung crackers lendong nung nisung 20 asü. 1990 küm Küllam nungsa Malanada tekülem kidang cracker apokba lendong nung nisung 26 asü. 2006 küm Thrissur Pooram benjung nung crackers ayuba store house ka apokba lendong nung nisung tenet asü.
Item tatalokba ajak ya cracker yangluba-amshiba ozüng takang maliba ajanga atalokba liasü.
Iba lendong atalokba sülen Ato kilonser, Narendra Modi-i lendong atalokba tesem semdang, iba sülen pai district hospital semdanga yirua alirtem ajurua liasü.
Iba tatalokba ya kanga tia maka ta shia Modi-i, “Ni Chief minister dang yirua alirtemji Delhi aser Mumbai-i (hospital tem) belenang ta shiogo, Centre-i parnok yaritsü,” ta ashi.
(Maneni tapak 10 nung…)