Komala temelenshi indang jembir ?

Nagaland nung assembly election agitsü alima atema nüboyimba sentongtem nung lennirtemi temelenshi, terenlok aser tejakleni aotsü indang onüktem kanga toktepa jembitepyonga arudar. Tesüiba election tem nunga item onüktem nung ajemdaker asen lennirtemi asenok mesüzükteta sorkar akümtsü tashi ngua asen state nung ketdangsüa aruogo, saka parnoki jembiba aser nangzükba temelenshi tubo tenük agi mongui dang süiogo. Taküm-a reprangdangra election nüboyimba sentongtem nung party balala nungi lennirtemi Nagaland melenshitsü, Nagaland yanglushitsü, Nagaland khenyongi balaka kümdaktsütsü indang onüktem jembiba asenoki angashir. Iba jagi Naga nunger lennirtem asoshi temelenshi ta asübaji state jenjang tamajungba kümdaktsüba dang ya ajar asü? mesüra state tia mejungi kümdaktsüba dangang ajarba asü? ta kanga ratar. Parnok kechi komala temelenshi indang jembir’ar mangateter, kechiyong parnoki election shia temelenshi bener arutsü indang jembir saka parnoki sorkar küma ketdangsüa arudang Naga lima tia tamajungba kümdakja melenshiba ang nguyonga arur. Iba jagi asen lennirtemi temelenshi ta asüba o jembiba angashidang aoksar aser tang-a kechi koma melenshitsüba aka! ta kanga shisabulur. Asen Naga lima tia iba dang nungi tamajungba küma melenshira, ayatai ta asüba tiaji iba jiang asütsü südi. Anungji, taruba election nung yabo asenok tiyazü tenangzükbatem ajanga mekülakokdaktsütsü merangdi. Joko iba inyakyim ya ojang dang südaktsüdi aser anendaktsüdi. Asenok kwiben ashiokdaktsütsü? Joko ojang ta asenoki tasü itta shidi arungma aser mapa agia sayudi. Tiyazü jembirtem aser ochimashi inyakertem nem asenok ojang dang anishidaktsüdi aser asen lima jenjang teküpokleni lujen anir meludaktsüdi ta ayongzüker. Tatemsa, Naga nunger lennirtemia ‘Ozü teloki taruba sorkar kümra Nagaland nung temelenshi bener arutsü’ ta masü saka ‘Asenok ajak tangatetba melenshir iba election nung shilem agidi, kechiyong asenoki yamaji inyak nungdang asen lima nung temelenshi tajung bener arutettsü’ ta jembi nungang nübortemi nenok dak temulung lema vote agütsütsü südi ta bilemer.