Konang o tenüngsang aser telongjem o mongdang

~ Talitemjen Imchen.

Oshi ka ji teti jembia aliba agi jembisemer aser teti zülua aliba agi zülusemer. Kodang jembisema zülusemdir, aika bendentsü akoker. Aika bendenba dangji takar ta ajar. Ano külenbo iba dangji oshi renlokba aser oshi ainba taa ajatsü akok.
Asenok tsürabur mapang, zülu maka liasü. Pei yim sasep dang oshi ji jembia aru. Parnok nokonü putu mapang, oshi dang nungi nisunger arakzüyim aser senzüsenpongyim ajanga tuluba jembi aser metettep. Joko akhi tsürabur nokonü putu mapang ama masü, saka oshi metetba aser angazükba ajanga, taküm ka pei pei wadang kokteta litetba putu ka lir.
Tanü alima putu yimya agi yimtsüng balala nung aliba oshi aser olong, nüngjakoja aser jayajako, jembishinü aser orenosü ajak lirumedemtepa, Aor ajak yaksü (alignment) ka nung aotsü merangteper aser tulu ka arua lir. Iba ama putu ka nung, ni/nai jembiba ji tai, pai/lai jembiba ji shitak ta shidanga ashitsü kanga tasak. Ner/ozü yimtak teti jembia aruba olong (meaning) ka süaka, olong agizükyim tamendakdak ji shitak melira samatsü mesüra mamshitsü. Ano olong tasen nai yangluba ji tamendakdak kaa yanglur lira, iba nungji tejang atangtsü. Alima-i sapua amshitsü.
Yimya agi kaket zülur ka ket nung mesüra onük jembir ka ket nung olong tasen aser kentet (quotation) tasen teti alir. Item olong tasen aser kentet ji alima-i kodang agizükteta amshitettsü, telok-i angatetba dakji keta lir. Putu melenshia aoba nungji keta lir. Ano olong karbo tamendakdak meliaka, yamai dang jembia aru, ya memelenshitsü ta jembir Aor aika dang lir. Mesüra pei atema olong tasen ka küma angashira, yabo tai jembir ta tangatetba arurtem lir.
Asenok dak tashimait ka ji, onük jembir aser kaket zülur-i peii meteta aliba indang, jembiba aser züluba dang shitak ta agizükteter. Iba jagi teloktentet nung adentsü aser kaket azüngtsü tejangraba chimia kümdaktsür. Peii memetetba onük ka tangar-i jembidangji, tai jembir ama mebilemtsüla. Saka ibaji angatettsü merangtsüla. Aikati tangar-i jembiba ji tai ta kanga melaa ashir. Süra kobala shitak? Nai metetba ji kobala ta asüngdang dangbo, peii metetbabo maka, meshiteter. Iba jagi loktitentet rajang kümdaktsür aser tejakleni maor.
Asenoki teti jembiba olong pezü “Konang O Tenüngsang Aser Telongjem O Mongdang” ya koma amshitsü tim karibo meteta alitsü akok. Saka ano item olong ya, aikati benteta amshiba mangur. Konang tetezü English oshi nung crown ta ashitsü akok. KO ji tekolak, kopangtsüng aser ko (hair) nungi agizükba olong lir. NANG ji nangten, aika nangden, talubusa nangden, item amala (etc) olong nungi agizükba lir. Tsürabur nokonü putu mapang, nokinketer tekolak aleper aser sü achir, parnoki alepba aser achiba züngdanga tekolak nung, tenem tepen konang küma nangden/asong/inok.
Tenüngsang/tetoshi tetezü telok nung shibai tangar den alakteta konang bener arudir, tenüngsang agütsür aser toshiteper (tetoshi/tetushi olong nung ya U masü O amshitsü nüngdaker. Kechiaser nisung tenüng Toshiba/Toshila ajak nung u masü o amshia lir aser olong ratetyim ji kasadang).
Kasaji tanüa kaketshir-i tetoktepba balala nung takok angudang aser mapa meranga inyaker-i naroküm (award) balala angudang, yimer yimsanger aser teloktentet balalai, pa/la tenüng asangba ji tim. Mesüra pa/la tenüng Toshiba ji tim. Saka aikati konang aser tetoshi agütsür mesüra konang aser tenüngsang agütsür ta jembir/zülur. Pa/lai asen teloktentet-ia tenüngsang den konang agüjaa lir, kü nem kechi koma konang densema tenüngsangji agütsü ta asüngdangtsü menua maka. Mesüra ner yimer/telok-ia kechi konang agütsü ta medemertem-i asüngdangtsü akok. Saka ibaji asen-i olong ana ji benteta mangatetba dang lir.
Telongjem o Mongdang olong ana ya tera balala lir. Yimya agi nisung kati ka ajurur aser ana nungi tema akümba dang telok ta ajar. Nusing ana dang nungi tema, ranglok ka mesüra nükjidong ka yur kodang adenshidir, iba dangji telongjem ta ajar. Telongjem tetezü balala aliba telong küma ajemtep. Telongjem, tentet aser telok olongtem ji kasa dang lir. Mongdang tetezü pei pei wadangi moi (keno kar jembitsü) mongdangadok. Tamangertem anogo teroknü buba nung limapur ama alui moi ajak mongdanger Tsüngrem külem. Iba jagi lia lia tenetnübuba dangji amongnü ta jatet. Telok/telongjem/tentet tanüa mongdang. Mongdang kadar. Mongdang, sentep aser adenshi olongtem ji kasa lir. Anungji asenoki angatettsüba ji, mongdang aliba agi longjemer masü, saka telongjem aliba agi mongdanger keno opang medemtepa lateter aser pangzüng küma amshiteper.