Kong nungi ochi tenzüktsü ?

Naga nunger aser ano talisa Aor ochishir kin ta jembia jembia ochishir kata mali litetba nübortemji asenok asütsü. Joko, shishilembadak seret meshitak amshiba nungi tenzüka yimten nung yimsüsür aser ketdangsertemi nübortem meyong senotsü miimzüka agiba tashi asenoki ochimashi inyakba mapatemji zünger mezüngma kümogo. Aji oda, government nungi senotsü tajangzük luzüka agitsü asoshi government primary school nung dena  tanurtem tenüng tiyazü bendena züluokba, Rural Development department nem tiyazü kilen aika bendenloker agütsüba, tangar tenüng nung ita sen agizüka agiba, mapa meinyak ser sen agizüka agiba, light auyaa atsükba, nütsüng yongsük tiyazü talila agütsüba aser electoral roll nung tenüng tiyazü aser tesem ka dak tali nung pei nüng züluokba ochimashi mapatem agi asen aliba ki aser lokti sünga kümogo. Joko, asenok kidang chiyongba chiyongtsü ajak ochimashiba len nungi aruba aser asen aliba kiojen ajak ochimashiba len nungi aruba rongsen agi aliba aser yangluba rongsentem kümogo. Joko, ochimashi mapatem agi ochi mapa inyaker ama sademsadema inyakba lima aküm nungji, asenok aika ochimashi mapatem agi kanga takar aser tulur kümogo. Itemji asenok jakdang aser asenok mulung nung junger amai angur aser bilemer saka shitakba nungbo mapa meinyaki chiyongba aser ochimashi mapatem ajanga takar akümba mapatemji nisungi peisasa pei külaoktsüba mapa asütsü. Shirnoki ochimashiba len nungi dang rongsen bushir, parnoki ochiba len nungi anguba rongsen agi kodanga tenük masüngtsü aser matatettsü. Ajisüaka, asenoki metettsüba kaji asenoki meinyaki anguba rongsenji rongsen masü, ibaji kodanga senmang küma züina maotsü. Aiben asenoki ochimashi len nungi nisung kar kanga karaa takar küma angur. Item rongsentemji kodanga magimatsü aser mesamatsü amato asenoki bilemer. Ajisüaka, asenoki repranga lia, item rongsen tulutemji maka akümer. Ochimashiba len nungi bendenba rongsenji pei chirnur keti maotsü saka asen taküm lia aseni ngua item rongsentemji samatsü ta asenoki angatettsüla. Alima ka nung kodang ochimashiba mapatem  agi kija kibong kar takar akümdang alima shirangdaktsür, iba limaji kodanga tipdema malitsü. Takarsangjia tetsübu agi amui moutettsü aser sadema mesenzütettsü aser sensakertema tebok mesüngteti auyatsü aser ozüng raksar akümtsü. Atangji, ochishia alitsüba ya tasak kechiyong ochishia linüra meranga inyaktsüla, maka aser makok aremtsüla aser aremzüktsüla. Ochimashiba len nungi aruba agi ki tajung ka nung alitsü agibo, ochishia ki tamajung ka nung aliba tajungba ta angatettsüla aser ochimashibalen nungi takok angutsü agibo ochishia inyakba agi tamakok angubajisa tajungba ta asenoki angatettsüla. Ochimashiba jenjang yabo temela aser angatia angur saka ochishia alitsüba jenjang yabo kanga tasak. Iba jagi aikati ochishia melitetter. Atangji, ochishia lira kodanga takar aser tulur makümtsü ta masü saka akümtsü aser mapang agiaka ibaji dang shitakba semchirsemnur tashi agia aotsüba ali senmang asütsü. Asen lima süngjemtsü aser topur ajungtsü asoshi asenok ajak ochishia alitsü kangsa nüngdaker, saka ibaji kong aser shiba nungi tenzüktsü ?  Ibaji asen dak nungi tenzüktsüla. Joko, asen  lima nungbo tiyazü nisung tenüng nungbo senpak kata agizüka magi aremtsüla, tiyazü seret agibo asenok tajangzük mebushitsüla, tiyazü nütsüng yongsük aser tiyazü vote agi takok aser tajangzük mebushitsüla aser tiyazü nung ita sen agizüka magitsüla. Kodang asenoki asen taküm aser kibong tiyazü lenmang nungi aruba rongsen agi taküm alitsü merangdir, asenok taküm aser kibongji alima nung tiyazü nung alir asütsü. Asenoki jungjunga bilemdangdi süra, asenok alima nung mapang tatsüka alidang yamaji aritepa tiyazü agi rongsen bendena chiajema kazür aotsübaji kecha nüngdak madoker. Asenokbo alima nung khen alidang tetezü keta alitsüsa ochishia inyaktsüla aser ochishia alitsüla.