Kong Samar Memetet

Alima nung kechisarena purapiteta yanglutsü aser itemji tajangzük küma amshitsü asoshi Tsüngremi meimchir nem shisatsü tulu agüja lir. Iba maongka tulu ya meimchirtem dak alaka shinga nema agüja mali aser iba shisatsüji amshia aseni yangluba sernung asenoka bangkatsüsa meimchirtemi kechisarena yangluteter; ibaji nisung nem Tsüngremi agütsüba sempet tulutiba rongnung ka asütsü. Tamashirtemi iba sempetji teraksa adokdaktsütsü atema amshir dang ashi alima meimertemibo ibaji pei atema dang masü saka alima rangben asoshi taküm bendanga agütsür amshia arur; iba yongjiang tanü asen aliba lima ya kanga dang tesüngmangtsüka renloka kümogo aser maneni temaba jenjang nung renlokyonga aotsü. Tesüngmangtsü rongnung tesüngmangtsü kaji mongzü ozütemia matongdak tua mopung nung yimzüa aotsü yanglutetba kol yaa ka asütsü. Tanübo tzüyimtem adena tenük agia mengudangba tesemtem ajak ajangdanga ghonda ishika tsüngda tayimtsü nung alima ka nungi ka tashi senzür. Iba atemaji alima nung mezüngbuba tayimtsü yanglutetba America nunger aviator, engineer & aviation pioneer adianu ana tenüng agi Orville Wright aser Wilbur Wright (Wright brothers) na nem alimai tetushi tulu agütsür. Atangji kecha gari nunga tonga motetba tesemtem tonga otettsüsa tayimtsü yanglutsü Tsüngremi meimchir nem shisatsü agüja aliba ajanga tanü nüburtem kanga dang anisüngzük angur saka shin o nung shia aliba ama, kechi anüngleni talangba tur tsükdir ibajisa tesashitiba aluagi tsüker asünung, tayimtsü tsükokba lendongsa tamajungtiba aser iba lendong nungibo tia akar kar dak alaka aiben mekümzüker. Ano tayimtsü lendong ajururtem rongnunga parnok amenba tayimtsü kong samar memeteti tayimtsü den külemi samartemjisa tia makatiba asütsü. Yamala lendong rongnung nüburtem mejanga moteti kanga dang nüken belema bushitsüsa atalokba lendongji 2014 küm March 8 nü kong samar memeteti samaba MH370 tayimtsü lendongji asütsü. Iba Boeing 777-2H6ER tayimtsü ya 2002 küm May 31 nü nungi Malaysia Airlines meyong aküm saka küm ishika sülen tia maka Kuala Lumpur International Airport, Malaysia nungi Beijing yimti Capital International Airport bushia aoba mapang kong samar memeteti sama. Iba tayimtsü nung inyakertemi tesüsaba air traffic control den jembibaji 2014 March 8 nü 01:19 ako (Malaysia nunger mapang) nung South China Sea adena aoba mapang liasü ajiserbo tanü tashi iba tayimtsü indang tsüngsü kecha menguteter. Tayimtsü nung inyaker Malaysia nunger par ter ana den kin per pongu nungi passenger noklang anaser metsür tenetji tang tashi tereta menguteti bushitepdar. Kanga junga asameyanger külen tesüsa MH370 tayimtsüji Indian Ocean nung luagi tsüok südi ta bilema senotsü jenti endoka tzüyim telung nung timtem jenti arema bushia liasü. Aviation otsü nung kin balala nungi nübu jenti tenlaa senotsü teimtiba endoka tayimtsü bushiba maparen tulutibaji ibai lir. Meranga bushidanger kecha tsüngsü mengutet nung mapang tatsüka iba tayimtsü bushiba anena liasü saka tan taoba Hombar Jan 22 nü nungi ‘Ocean Infinity’ ta ajaba company ka ajanga asentenshir tzü telung nung high-tech drones amshia iba tayimtsü bushidangtsü tenzükba osang ka asenoki iba osangkaket nung züngogo. Iba maparen takok ngutetra parnok nem sen US dollar million 70 tashi agütsütsü nangzüktepa lir. Aji oda süaka, senotsü ajangzüktsü bilembaji nükjidong tutluba masü saka parnoki danga tayimtsüji ngutetra idakji samar aliba kinüngertem anisüngzük angubaji ulura asütsü. Mangjibo shizüka oor alitsü saka teret danga anguka asübo hau parnoka atangji tzüyim nung süogo ta asüba kuli kabo jangjatettsü. Atangji idakji samar aliba kinüngertembo manga mangu tanü tashi animesüngzükteti temulung kanga dang shirepa lir saka asenokbo kodanga masütsü ama asüküma bilema kati ka majinü mesüra kati ka ajemoka yutsütsü meranga liteper. Tia mekara asenokia kasa tiaji ajurutsü; kinünger adianutemi memetet kong samar memeteti samatsü meteta maka. Anungji asenok alima nung tatsüka alidang kati ka meimtepa alitsüji kanga dang tongtibang; asenok süaka temeimbo kodanga masütsü.