Konyak Heritage Village atema long azüngtsüogo

Dimapur, April 03 (TYO): Advisor DUDA, LM & CP and NIDC, Thongwang Konyak-i April 01, 2017 nü Wangkha College anasa Abang nung Konyak Heritage Village atema long azüngtsüogo. Iba long ya Konyak Students’ Union (KSU)-i azünger.
Iba sentong nung jembidang Thongwang-i, tanüasüng nüburtemi tongti tejaoker onük nung temelung kangabo magutsür saka sen ang timba imlar; iba melungsentsü yabo melenshitsüla, ta ashi.
Par Department kübok terenlok mapa balala inyakba metetdakja pai, state nung sorkar mesüngjemteti aliba ajanga terenlok project aika mapang shitak nung tembanga meinyaktet, ta metetdaktsü.
Heritage village terenlok atema pai sen lakh 10 tenla agutsü aser iba maparen ketdangsüa inyakba atema KSU nem tenüngsang agutsüba den Leangha yimi ali tenla agutsüba atema pelaba metetdaktsü.
Mon Deputy Commissioner, W. Honje Konyak-ia Konyak nunger sobaliba takar wazüka ayutsü aser ajungkettsütsü atema heritage village amenoktsü asoshi kaketshirtemi iba mapa tajung apiteta inyakba atema pelaba lemsatep.
Pai ashiba agi, heritage village atema tesemji, Mon jila atema tzü belenba kümzüka ayutsü atema forest Department-i wazüka ayuba tesem ka lir.
DC-isa Konyak NGOs, MLA tem aser nüburtem dang iba yim terenlok atema amalitepa inyakdaktsüner, ta mepishiba den külemi iba project renloktsü atema inyaktsüji Konyak nunger ajak teinyaktsü khuret lir, ta metetdaktsü.
Leangha village Loung Anghpa-ia, Konyak nunger terenlok atema iba li ya angati agutsür, ta ashiba den külemi Konyak nunger lenirtem dang iba project tesadang dang meinyaktsü aser nija tajangzük atema mamshitsü mepishi.
Iba project atema ano ali tali nüngdakra yimi agutsütsü melunga dang lir, ta paisa metetdaktsü.
Iba sentong nungsa Konyak Students’ Union Tir aser KU den KNSK nungia jembia liasü.