Konyak nungeri Angh indang reju wazüka ayutsüla : Dr. Shurhozielie

April 4, 2017 nü Mon nung Chief Minister, Dr. Shurhozielie Liezietsu aser tanga ketdangsertem Konyak Union Office Building lapoktsüba sülen agiba noksa angur.

Dimapur, April 4 (TYO) : April 4, 2017 nü Mon jila nung Nagaland Chief Minister, Dr. Shurhozielie Liezietsu tongti tesemdanger ser Konyak nunger benjung Aoleang benjungmung sentong kanga longsua mongogo.
Iba benjungmong sentong nung jembidang, Dr. Shurhozelie-i “alima kanga kara ainer, anungji Konyak kini Angh indang reju wazüka ayutsüla. Iba akhümket aser tetushi reju ya wazüka ayutsü nüngdaker,” ta tayongzükba agütsü.
“Asenok temelenshi adokba putu ka nung alir saka Naga nungertemi asen sobaliba aser inyaksangshitem wazüka ayutsüla. Kin aikati sobaliba tanaben lepa bener arutsü atema mapa inyakba angudang kanga pelar, aser tanü asenoki amshiba sobaliba ya tarutsü putu nem benoktsütsüla,” ta paisa ashi.
“Benjung mapang asenok kati ka semdanger aser tesentaktep akangshir. Iba ama benjung nung asenok Naga nungertemi asen dak keta aliba tashi aser nokinketer yimyatem sayur,” ta Chief Minister-isa ashi.
“British nunger yimsüsüba mapang parnoki Konyak nunger dang ‘mejanga aliba molusongzü’ ta tenüng jaloktsü. April 4 ya Naga nunger asoshi kanga dang tongtipang anogo ka lir, kechiyong alima rara tanabuba nung April 4, 1944 nü Japan nunger sepaitem Kohima tonga aru. Tanü anogo ya Aoleang Monyu amunger, Konyak nungertem atema tongtipang anogo ka lir, kechiyong ni Chief Minister kümer tang mezüngbuba Mon semdanger” ta Dr. Shurhozelie-isa shisem.
Paisa, Naga nunger kin ajak kibong ka ama longjemtsü aser lanu putui ‘backward’ kin ta asüba nüngja agientsü atema merangtsü tayongzükba agütsü.
Urban Local Bodies Election nung Konyak kini sorkar pusema nungitba atema Dr. Shurhozelie-i pelaba metetdaktsü.
Tanü sentong nung Dr. Shurhozelie-i Mon nungi Namtola tashi National Highway tenüng agütsüba osang metetdaktsü aser iba atema taküm küm asoshi sen crore 5 lemzüktsür ta shisem.
Tanü Chief Minister Dr. Shurhozelie meina Parliamentary Secretary tem- Y.M. Yollow, E.E. Pangteang, N.Thongwang, Eshak, aser L. Khumo Khiamniungan nunger aru.
Sentong nung tetushi süa jaokerji Director, NEC Energy Pvt.Ltd, Sapu Bathtacharyya liasü aser pai o jembidang, “asenok ajaki teimla nung alir aser iba teimlaji Tsüngrem dak ayutsüla,” ta ayongzük.
Konyak nungeri sobaliba wazüka ayuba atema tenüngsang agütsür. Akhidang nungi Assamese aser Konyak nunger tsüngda tesentaktep tajung liasü aser iba ya meraksai ayutsüla, ta Sapu-isa ashi.
Sentong nung Moiya N. Konyak-i Aoleang Monyu benjung indang teratet metetdaktsü, Sheanghah Union Mon, Chen Nokten Union, Mon Union, Totok Union, Longching Union, Tang Union, Wakching Union, Lonkei Union, Shangyin, Chi Union aser Hongphoi Union temi yartsüngsang aser ken ajanga shilem agi.
Iba sentong nung mendenji L.Tongang Konyak liasü, Principal-MTC Rev. Honlong Yanlem-i temoatsü meshia sarasadem aser President KU S. Manlip Konyak-i tesentepertemn pela agizük.
Dr. Shurhozelie-i KU Office lapoktsü
Tanü Nagaland Chief Minister, Dr. Shurhozelie Liezietsu-isa Konyak Union Office building tasen lapoktsü.
Iba office ajanga Nagaland nung aliba Konyak nunger dang masü saka Assam, Arunachal Pradesh aser Myanmar nung aliba Naga nunger tsüngda tesentaktep akangshitsü imlar. Iba office ya Naga nunger ajak atema centre ka asütsü, ta Dr. Shurhozelie-i ashi.
Sentong nung mendenji Honang Konyak liasü, KU office Construction Committee Convenor Hoka Konyak-i okila jembi aser District Chaplain Ashim Nyamto Konyak-i meshiteta sarasadem.