Konyak nungeri junga inyakogo

Alima nung tangar shingaia meinyaktetba mapa inyaktetba mesüra shingaia metongtetba jenjang ka tongtetba takok reprangteta naroküm agütsüba telok Guinness World Records ajanga Konyak nunger nem alima nung nisung teimtibai shilem agia akhi tsürabur mapang nungi tsüngsanga aruba tsüngsang ka itetba naroküm agütsübaji Naga nunger ajak asoshi alima tsüngdang tenüng tajung ka asütsü. Asenoki inyaktetba mapa tapu balala agi asenoki asen lima ya alima dang sayutsüla, iba jagi dang asen lima ya nüngtugu akümtsü. Iba akhi tsürabur tsüngsang ya April 5 nü Konyak Union ajanga Mon nung ayongzükba Aoleang benjongmong sentong nung Konyaktsür parnok 4687-i minute 5 ser second ana tashi pei sobaliba sübotsü sübor akhi tsürabur ken tena tsüngsanga liasü. Atangji, nisung 4687 tashi ayongdena külemi tsüngsanga ken atentsü bushitsübaji kanga tasak lir. Yangji senotsü endoktsü nüngdak adoker aser nübo peria agütsütsüla. Ibaji asemben pezüben ka ajurutepa tendanga idangba agi ajungla masü. Ajisüaka, alima nem Konyak nunger tsüngsang aser Naga nunger aliba metetdaktsütsü asoshi Konyak nunger lenirtemi kanga meranga inyakogo. Atangji, alima nung shingaia meinyaktetba mapa ka inyakteta Guinness World Record-i iaka, iba takok asoshi parnok nungibo senbo mangutsü, parnoki certificate ka dang agütsütsü, anungji Guinness World Record yanglutsü asoshi inyakertem senotsü teyari kecha mangutsü aser ano Guinness World Record purtemjia iba nung jagi idangjisa tajangzük angutsüsa lenmang mali, ajisüaka iba telok yagi alima ajunga nung tangar dang nungi alakteta mapa tajung aser tulututiba inyaktetba noksa aser osang shitak bendena küm shia  kaket adoker aser iba kaket ayokba nungi anguba sen jagi dang parnok mapatemji anepalur. Ajisüaka, Guinness World Record-i itetba takokji tulu aser iba nisung aser telokji tangari nüngdak balala nung amshia senzütsü. Iba denji ano alima ajungalen asen lima aser nisungtem sobaliba tajung meteta akümba ajanga asen limai raliwalirtema tali tali aru tenzüktsü. Asen lima nungbo tang tashi nisung noklang ka shia mapa inyaktsüsa anioktsü industry kata mali, anungji asenok atema raliwalirtem (tourists) gari nung aser tetsüng agi anir jajaba, parnok anendaktsüba aser chiyongba mapatemjiang mapa inyaktsü angudak industry asütsü. Aji oda, tangbo alimai Naga kintem rongnung Aoleang ta ser benjong tuluka Konyak nungertemi April ka nungi tenzüka amonger ta metetogo. Anungji, sangküm nungibo benjong ayongertemi jelia benjongmong sentongji Nagaland tourism website nung agütsüra, alima tesem balala nungi raliwalirtem Koyak limai arutsü. Konyak lima nung tereprangtsü tongtibang tesem aika lir, anungji item tesemtemji sema item otsütemji English agi raliwalirtem dang shia külemi senzütsüsa tang yongi lanurtem karbosa renemtsüla. Ano, nübortem ajangzüktsüba mapa kaji, asen lima nung Kohima aser Dimapur dak alaka raliwalirtem anentsüsa yimluser semtu (hotel / tourist lodge) peria yanglua maka, anungji raliwalirtemji kibong kari pei kidang anendaktsütsü aser parnoki dang soruchioka chiyongdaktsütsüsa kiojen renema yura, item mapatem jagi Aoleang benjong nung dang masü saka raliwalirtem aru shia senotsü aika ajangzüktsü. Asenoki metettsüba kaji, iba ama mapang asenoki bendanger raliwalirtem dang parnok ayipba, chiyongba aser anir jajaba atema sen talitapongbo memeshitsüla. Iba jagi parnok pelatsü aser ano tanabena arutsü. Ano, chiyongtsüa bendanger chiyongtsütem dang masü saka asenok lisopurtemi chiyongba chiyongtsütem renema chiyongdaktsütsü merangtsüla. Atangji, kari mersü tashi machir aser kari metsü tanang machir, anungji itemjibo asüngdanger renemtsütsüa akok. Aji oda, küm shia asenok Naga nunger kin shia pei pei sobaliba benjongmong ya alimai memetet pei pei tesep nung dang memongi, tang Konyak nungertemi amongba ama alimai metettsüsa jelia website nung benjongmong sentong sangdonger amongtsüla. Küm nung khen Kohima nung Hornbill benjong amongba yagibo alimai Naga nunger ajakbo memetetter aser Naga lima-a tulubalenka mangur aser Naga nungertem rongnunga ishika dang tajangzük angur. Ajisüaka, kodang kin shiai pei sobaliba benjong ya alimai metettsüsa mongdir asenok raliwalirtem nungi senotsü ajangzüktsüsa lenmang lapokba dang masü saka asen sobalibatema tajungba amshia aotsüsa asentenshi adoktsü.