Konyak nungertemi Aoleang benjung amung

Minister Sazo-i Naga lanurtem dang ‘backward’ nüngja agientsü ayongzük

Kohima, April 1 (TYO) : Naga nunger lanurtemi competitive exams nung takok ngua ‘backward’ nüngja agientsü atema merangtsüla, ta tanü Public Health Engineering Minister, Chotisuh Sazo-i tayongzüba agütsü.
“Asenoki backward kin ta asüba nung shilem mekazüka ayuba mesüra lemzükba menüngdaker, saka asenoki tangar den kasa akümtsü aser backward nüngja agientsü atema merangtsüla” ta Naga Heritage Village Kisama nung Aoleang benjung nung o jembidang Sazo-i ashi.
Aoleang ya Konyak nunger atema benjung tulutiba lir aser iba benjung ya metsü prokba mapang Tsüngrem nungi temoatsü meshiba mapang ka lir. Aoleang benjung ya anogo trok tashi amunger.
Naga nunger kin aika tangar memenepba kin ta asüba agi sorkar sector aika nung nübo ajema lir. Ibaji shisaliok tsütsü tangar memenepba ajanga lir saka tanü Naga lanurtemi alizüng tulu yur competitive exams nung takok angutsüsa merangtsüla. Lanurtemi backward quota nung temulung malemtsüla saka takok angutsü merangtsüla, ta PHE Minister-isa ashi.
Lanurtemi sorkar mapa dak dang merangloktsüla saka tanga mapatem inyaktsüla. Ibaji backward nüngja agientsü merangba nung tejakleni aoba mera ka asütsü, ta paisa ayongzük.
“Asen oboula nungertemi sobaliba aser meranga inyakba ajungkettsü atema ibala benjungtem ayongzüka amung. Ajisüaka, tanü asen Naga loktiliba nung Minister aser Contractor tem dang nungi senotsü teyari meshia benjung amunger aser iba atema sasa bilemer. Anungji, tanü asen putu nunga oboula nunger mapang ochishiba aser meranga inyakba sobaliba tajung lepa bener arua amshitsüla,” ta Sazo-isa ashi.
Tanü sentong nung Additional Chief Secretary & Development Commissioner, Government of Nagaland, R B Thong-ia o jembidang, Konyak Naga nunger ket nung temo aketba ali lir aser talisa Naga nunger ajak peritsüsa Tizit o Naginimora nung alu yimtettsü, ta ashi.
Centre sorkari Dimapur nungi Tizit tashi railway line yanglutsü mulunga agizükogo aser kobi melii iba mapa tenzüktsü, ta Thong-isa metetdaktsü.
Aoleang benjung atema chief host ji Rural Development, Rural Employment & Poverty Elevation Minister, C L John liasü.
Sentong nung Konyak Baptist Church Pastor, Moba Konyak-i temoatsü meshia sarasadem aser Minister Chotisuh Sazo aser Minister CL John na den Additional Chief Secretary Thong nungertemi aou azünga yutsü.
Tanü agiba sentong nungsa NPSC Chairman, A. Yanang Konyak-i Aoleang teratet metetdaktsü, Konyak Union Kohima President, T. Ngamjok Konyak-i tesentepertem pela agizük, Chen, Tobu, KNSK/Tangshem, Wakching aser Mon teloktemi yartsüngsang agi shilem agi.