Konyak Region, NSCN/GPRN-i lenir, Isak mangyimer

Dimapur, July 07 (TYO): Tanü Central Administrative Officer (CAO) Konyak Region, NSCN/GPRN-i sangdong ka ajanga,  Mendenbuba, Isak Chishi Swu alima nungi pilaba atema Konyak National Workers-i mangyimer, ta metetdaktsü.
“Pa ya temelenshi adokdaktsür tulutiba dang masü saka asen nüburtem atema tashitait tesayur ka liasü. Mendenbuba Isak Chishi Swu lenisüba kübok NSCN-i ozü lima nung headquarters amenokba sülenang yimten aser Khristan tamangba yimsü indang meteta aküm. Iba sülen kobi melii ammang samatsü tenzük aser anepdang tesangwa tenzük. Osangtajung sangdongba aser iba sülen tzü nung baptitsüba ajanga merirjang aika tenela kümzük,” ta kasa sangdong nungsa shia lir.
Satan aser tsükchirtem naprong den raratsüji mapa temela ka masü, saka Mendenbuba Isak-i ibaji takok ngua inyaktetogo. Rev. Mankup aser Pastor Chingang nati ashiba agi, “Mendenbuba Isak melira tanela nung aika samar alitsü liasü.” Shisaliok tsütsülen Chairman Isak lenisüba kübok NSCN-i aika inyaktetogo. School aika lapoka tanurtemi kanga jangrabangraa angazüktsü tenzük, ta sangdong nungsa shia lir.
“Asen lenir asür, Isak Chishi Swu nem onoki akhüm agütsütsü aser tushitsüsa o agi mepiritsü akok, saka onoki ashitsü ajak agi, nai toktsüba tsüngsüji ozü putiotsü nung teti alitsü. Onoki pa kinüngtsü aser chirnurtem den tejashi aser mangyim lemsateper. Pa tanela tesünep nung anisüngzükang,” ta Konyak Region, NSCN/GPRN-isa metetdaktsü.