Korea ana tsüngda senden mena akangshia aotsü jembir

Seoul, Aami 01 (Agencies) : Otsü asütsüsa US Tir, Donald Trump o North Korea lenir, Kim Jong-un na senden amentsü renemtepba mapang ka nung linük ana tsüngda tesendaktep tali akangshia yanglushitsü nükjidong nung tanü Rogonü North aser South Korea na tsüngda senden mena temaba jenjang nung ken o jembiogo.
Shidakbabo North-South na ken o lemteptsü atema sendenji agir alitsüba liasü saka joint US-South Korea air force drill agiba ajanga jashir Pyongyang-i songtema ayu.
Aji oda süaka Monupii/May 25 nü “Max Thunder” sentong tembangba sülen anogo ka dang lir North Korea lennir, Kim-i ajungbena dang South Korea Tir, Moon Jae-in den arrtsü nung Panmunjom yimdak senden amen.
Taoba Rongchii/April ita lennir ana tsüngda temaba jenjang nung senden mena tezüngzüktepba yanglua alibatem mapa agi inyaka aotsü asoshi tan ita piyong ano senden balala amentsü asoshi Korea ana lennirtemi mulunga renemogo, ta tanü senden tembangba sülen linük ana telongjem osang ka nung metetdaktsüogo.
Sepaitem tsüngda general-level nung ken o jembitsü asoshi tan Aami/June 14 nüji senden ka akatsü renema lir, ta kasa osang ajanga metetdaktsüogo.