Korea den merarai paidoktettsü lenmang lir : UN Secy. Gen

United Nations, Jan 17 (Agencies) : North Korea den tongpang merarai ibaji paidoktetsü lenmang lir, ta tanü Bodhbarnü UN Secretary-General Antonio Guterres-i metetdaktsüogo. Pyongyang-i nuclear osettem renemba maparenji nokdangtettsü atema tashi tulu aliba linüktemi anir indang-indanga ken o jembitsüla, ta paisa ayongzüka shiogo.
Tensa süngjema kümdaktsütsü asoshi tawa koba South & North Korea nati asalentonga inyadagi, ibaji tenüngsanga metetdaktsüba mapang, “Tongtibang teinyaktsü maparenjibo ano metembang,” ta Guterres-isa metetdaktsü.
Paisa ashiba agi, “Tongpang merarai nokdangtettsüji lenmang lir ta ni temulung lemteta bilemer saka teti atema yimjung aruogo ta tangsabo ni meshitettsü.”
“Iba dak sendakba maparen takok angutsü meranga shirnokisa nendaka inyaker aser kati ka den temulung agüja ken o jembir, iba nung takok ngudaktsütsüji kü nükjidong,” ta UN lenisirsa metetdaktsü.
Taoba Portugal ato kilonser ya UN chief ka ama tan ita nungi küm anabuba nung ayaoker saka tawa North Korea dak sendakba tebilemtsü tulu agi alima ajunga tatayuyudagi.