Korea linük ana jungteptsü tenzüker

South Korea ketdangsertemi North Korea yimtiba Pyongyang nung Kim Jong-un den anogo ananü olemtepba sülen North Korea-i nuclear programme anentsü mulunga lir ta osang ka metetdaktsüogo aser iba ya alima atema osang tajung lir. North Korea-i United States den olemtepnür aser iba olemtepba mapang missile aser nuclear tendangba ajak anena atatsü mulunga lir ta South Korea ketdangsertemisa metetdaktsüogo. Linük ana tsüngda senden amendang Rongchii (April) ita tatemlen North Korea lennir Kim jong-un aser South Korea Tir Moon Jae-in na ajurutepa senden ka amentsü telemtetba agi aser iba ya ajanga North Korea-i alima den lenmang lapoktsür ama ajiteter. Taoba ita Pyeongchang Winter Olympics nung North Korea-i shilem agiba sülen tawa Pyongyang nung senden ka amenba ajanga olemteptsü asoshi lenmang sadema lir ta asüba sayur. North Korea-i ita ishika tejakdang US tonga aotsüsa nuclear oset aser missile tem parnok ket nung lir ta jembiba sülen tang US den olemteptsü mulunga lir ta ashiba ajanga parnoki yimjung aginür südi ta bilemer. Anungji North Korea-i olemteptsü mulunga lir ta asüdang US-i tekaraba nung lenji aotsüla aser temulung lemtettsüsa telangzüba agütsütsüla. Donald Trump-i U.S. President inyaktsü tenzükba sülen nungi North Korea amaktsü amokmerena arur. North Korea-i nuclear weapons maparen maneni inyak aser US-i tenokdangba maneni agüja aru. Ajisüaka, North Korea o U.S. tsüngda toktepba manenaka South Korea President Moon Jae-in-i yaküm Tir inyaktsü tenzükba sülen nungi North Korea den tesentaktep yanglutsü atema mapa inyaka aru. Moon Jae-i yimjung mapa inyaka aruba ajanga taküm South Korea nung Winter Olympics lapokba sentong nung adentsü atema Kim jong-un-i tenu Kim Yo-jong yok. Iba sülen tang South Korea ketdangsertem aser Kim jong-un tsüngda senden menogo. 2011 küm Kim jong-un-i tebu ket nungi yimsüsüba menden melenzükba sülen bendanger den toktepa dang mapa inyaka aru saka tang US den olemteptsü mulunga lir ta asüba ajanga pai yimjung aginür aser tangar ama par linük sadoka lidaktsünür südi ta bilemer. Donald Trump-ia South aser North Korea tsüngda olemtep tenzükbaji kanga dang mapa tongtipang ka ta shiogo aser iba ajanga paia Kim jong-un den jungtepnür asü ta asüba teimla ka agütsür. South Korea-i iba osang metetdakjaka tanü tashi North Korea nungibo osang kecha mali saka parnoki U.S indang telangzüba atar asütsü akok. Anungji, Korea linük ana aser East Asia indang tia melenshidaktsütsü atema aser iba tesem nung yimjung bener arutsü atema Donald Trump-i Kim jung-un aser Moon Jae-in na den tangatetba tajung nung mapa inyaktsü nüngdaker.