Korea nung küm 60 sülen kinünger den ajurutep

Seoul, October 21 (Agencies): Korea rara ajanga küm 60 dak tema piladaktsür aliba kinungertem ajurutepdaktsüba sentong tanabuba nung, South Korea nunger nisung tain 400-i North Korea nung aliba kinungertem den kijakija ajurutepa liasü.

Parnok ajurutepdaktsüba ya TV nung gondha ana sayua liasü. Küm aika lir parnok ajurutepba mapang nüktzü yima ajurutepa liasü.

1950 nungi 1953 tashi Korea nung rara adokba mapang nisung million aika pei kinunger nungi pila aküm.

Iba rara ajanga aianu aser adianu, kinungtsü aser kinungbo den tsürabur aser tanurtem tesem balala-i prokshia piladaktsü.

Tan hopta North Korea nung tanaben lungjemdaktsüba sentong (reunion) ka agia liasü. Iba ya anogo asem nü asoshi kanga dang tazüokba nung küm pongu nung khen akar. Iba sentong nung parnok kinungertem den gondha 12 asoshi ajurutepdaktsür.

Iba mapang temerbo ano parnok tanaben linük balalai senshir.

Tan sentong nung nisung aika ajurutepba ajanga tarütsü nung ajuruteptsü maongka angutsü kangbo timla mali kechiba süra linük ana tsüngda arrtsü len civil ka danga mejajadaktsür aser tesendaktep kecha meyudaktsür.

Mongolbar nü South Korea nunger, karbo kangsa tain kümer jajatsü mokokba ajanga arrtsü ajanga ambulance nung anir oa lir.

Ajuruteptsü tesem atongba sülen parnok nem chiyungtsü tera agütsü aser par kinungertem den ajurutepdakja liasü.

Parnok ajurutepdang karbo azüteper ajeb aser kari tejak nung mimshia tanaben ajurutepba mangmangteti reprangtepa liasü.

Parnok o parnok na alemli külemi tangokba black & white noksa den tanü asüng tangokba colour noksa tem lemsatepa liasü.

Parnok ajurutepdaktsüba osang tejangja ya South Korean media ajanga metetdaktsü.

Iba ajurutepba sentong ya 2000 küm North-South Korea na terenlok aoshi senden ka akaba (summit) mapang nungi tenzüka liasü ajisüaka ajuruteptsü shimteter dang nung tali iba sentong nung shilem agia arur.