Korea, Saudi-i kokogo; Syria Play-offs nung asayatsü

Tehran, September 6 (Agencies): Mongolbarnü Omar Al Soma-i mapang apuloktsür asayaba mapang nung goal ka agütsüba ajanga Syrianunger Asia World Cup play-offs nung asayatsü asoshi maongka nguogo. Kasa mapang nung South Korea aser Saudi Arabia na taruba küm Russia World Cup nung shilem agitsü asoshi jenjang ajangtetogo.

Mongolbarnü Syria aser Iran na asayaba nung Syria nungeri 2-1 agi mekoki liasü saka asaya tatemi mapang apuloktsür asayaba nung minute asembuba nung Al Soma-i goalkeeper Alireza Salimi kayabok ajanga ball metsüoktsüa goal agütsüba sülen score kasasa küma parnok play offs nung shilem asayatsü asoshi maongka ngutetogo.

Iba ajanga Syria nunger Australia den home aser away nung asayatsü asoshi maongka ngutetogo aser iba asaya takoker intercontinental play-off nung shilem agitsü.

Asia qualifying group games asaya tatembangbuba aonung South Korea aser Uzbekistan na tsüngda asayaba nung telok kati danga goal magütsüteti tembang aser iba ajanga Korea nunger WC 9buba nung atonga asayatsü asoshi maongka ngutetogo. Kasa mapang nung Saudi Arabia-i Japan goal 1-0 agi koka parnok qualify süogo.

Asaya nung Fahad Al Muwallad-i goal ka agüja Japan madak takok anguba ajanga Saudi pur World Cup nung 5ben buba atonga shilem agitsüba atema maongka ngutetogo.

Taoba mapang nung Group B asaya nung Australia-i Thailang 2-1 agi akok saka parnoki iba dak nungi talila goal magütsütetba atema goal difference agi parnok automatic qualify masü.