Korean Peninsula nung tongpang meraradaktsütsü: Xi

China Tir, Xi Jinping-i Beijing yimti nung ayongba 5 buba Conference on Interatcion & Confidence Building Measures in Asia (CICA) foreign minister senden nung o jembia shilem agiba noksa nung angur. (Beijing, April 28)

Beijing, April 28 (Agencies): Korean peninsula nung tongpang raraba ajanga anasa tentetba linüktem nem tajangzük kecha bener marutsütsü ta shia, China-i Korean peninsula nung makmakshidak tensa matalokdaktsütsü aser tongpanga meraradaktsütsü tenangzükba olen ka China Tir, Xi Jinping-i tanü, Brehostibar nü metetdaktsüogo.
Asia nung tentetba linük 28 nungi foreign minister-temi amenba senden ka nung onük jembidang Xi-i tanü iba olenji metetdaktsü.
United Nations (UN)-i agiba telemtetba anema inyaka, North Korea-i par tongpang nung amshitsü tongpang osettsüset tendangba ajanga Korean peninsula nung tensa mejungi kümdaktsüba aser China-a jashidaktsüba osang bushiteta lir.
“Korean peninsula anasa tentetba linük ka ozü China ya lir anungji, iba peninsula nung makmakshimak tia matalokdaktsütsü aser tongpanga meraradaktsütsü nangzüker,” ta Conference on Interatcion & Confidence Building Measures in Asia (CICA) senden nung Xi-i nenshia ashi.
Ano külen, N Korea-i tanüa intermediate range ballistic missile ka tendanga kadok saka kasaji kadoker second ishika tsüngda nung ali nung tsükokba osang ka South Korea’er defence ministry-ia metetaktsüogo.
Tanü tamakok angubaji Pyongyang-i hopta ishika tsüngda nung par missile tendanga kadokba maparen tanabuba tamakok nung tembanger lir.
N Korea-i taruba May 6 jakdang maneni nuclear tongpang oset ka tendangtsü sentong renemba osanga angazükogo.
N Korea pusemba tongti linük kija süaka, China-ia Pyongyang’er tongpang nung amshitsü nuclear tongpang osettsüset yanglua kasaji tendangba maparen anemtsü tenzüka lir.
Ano külen, Korea linük anati 1950-53 tsüngda raraba tongpang yimjung tezüngzüktep masü saka meraratsü nangzüktepba ajanga dang anenba yong par linük ana tsüngda tangasa tensa mejungi lir aser tensa tamajungba mekümdaktsütsü nükjidong nung US-ia par mitkar züngsem 30,000 shi S Korea nung tang yuja lir.
Mangatettep adokba South China Sea (SCS) par yimli kübok aitba olen ka sangoktsüba den külem, SCS nung tensa junga lidaktsütsü asoshi Xi-i tanü nangzüka liasü.
China-i SCS tzüyim shilem tuluba ka par yimli kübok aiter ta züngshir saka kidangsüa aliba Brunei, Malaysia, Philippines, Taiwan aser Vietnam linüktemi iba onükji magizüki China den mangatettep ken o benoka lir.
Tan amenba 5 buba CICA senden nung tetendanger ama shilem agir linük 6 rong nung US o Japan nata densema lir.