Kotak aser Ki : T. Ken 127, 128

 “Tsüngremi kechi lungjemdaktsü, aji nisungi tepiladaktsü.” (Mat. 9:6).
Kibongji tatem maka Tsüngrem tebilemba. Ibai Tsüngremer teyangluba tongtipangba telok (unit) lir. Satani ibaji tetenzük nungi raksatsütsü merang. Kibong tali, tali raksaaa aor. Tezüngzüktepba tenangzükba makai akümer. Apuani tsüngda majinütepi akümer. Tanurtemi tsüraburtem anema apusor. Ibai tatem anogo temaitsü lir. Malaki 4:5, 6 nung tatem anogo meyipa arudaktsütsü indang Tanela Temeshii jembi.
Tenyar Pauli 2 Timoti 3:1-7 nung tatem anogo nung timtem arutsü shizüka yutsü. “Saka tatem anogo nung tetsübutsü mapang arutsü ta metetang… teti angazüker saka ochi metetba dangi kodanga marutetba.”  Item anogotem tanga asenok den lir. Kibong taküm alitsü asoshi item tongmelang tütuyuba anidaktsü merangang. Kinüngbo aser kinüngtsü teti temeim nung aintsüla, aser akhüm tsübutep alitsüla. Külem sarasadem aser Lai O nung shisadangba alitsüla. Shidak meimba tetezü tamang katetba, tatok agütsütepba aser taremzük aliba. 1 Korint 13: 4-7 külemi angazükang aser meyipa reprangshiang. Telungjem nung tashi mait ajitetra yakta tsüngi o agütsür bushiang.
Tsüraburji tanur asoshi tatishitsü (model) asütsüla. Tanurtem metsübudaktsütsüla mesüra tali tsüngirai masütsüla. Kodang tanur dang tsüraburi tali tsüngidir tsüraburi parnok dak temulung malemer ta angatetter aser akhüm metsübur. Tanurtem den tembar akümtsüla.
Kibok tekülem sabang jagi kibong nung temelenshi aika kadaktsür! Külemi sarasademba Kibongji külemi alir. John Wesleyi (1703-1791) kuli agüja ashir, Khristan yimsü indang England nung theologiantem dang nungi kütsü nungi timba angazük.
Tsüraburtemi tatembang mapang nung ataloktsür nangzükba Tanurtem asoshi meshidi: “Tatem anogo nung meimchir ajak nem kü nela mekeploktsütsü, aser ner jabaso aser jalatemi shimtsü, aser ner asangurtemi mangdang angutsü aser ner tamburtemi pungmang pungmangtsü.” (T.M. 2:17). Tepela Kibongji yakta kotak anguba lir.
Kibongji nungji kodang Tsüngrem lidir yangji tepela aser temulungjang shia temeim agi asüngtsü.
Kodang parnok taginüba ka dang aser sarasadem ka dang südir aser parnok kotaker anisüngzük ka dang südir (Henry Ware Jr. 1794-1843).