‘Kotak Lenmang’ kaket saya

Dimapur, April 2 (TYO) : ABAM Children Sunday sentong nung ‘Kotak lenmang : Tilatem Alizüng Yangerba Kaket’ ta sür kaket tajung ka sayaogo. Iba ya Wb. P. Alem Jamiri züluba liasü.
Tanü Ao Baptist Church Diphupar nung ABAM Children Sunday sentong den repsema iba kaket ya sannüker Wb. Lipok Jamiri sayatsü. Tila tanürtem asoshi wazüka ayuba anogo ka nung iba kaket ya tila tanürtem ajak tenüng nung sayar ta kaket züluri metetdaktsü.
“Tang tashi nung asen tetsü oshi nung tila tanürtem asoshi noksa teperi aliba kaket mangur, anungji tila tanürtem atema yamala kaketji nüngdak ta ajiteta ni iba kaket ya zülu”, ta kaket zülur Wb. P. Alemi ashi.
Iba kaket nung ya tongtibangsa tila tanurtem Ao oshi angazüktsü atema olung ajak Engraji nung footnote agüja lir. Iba den ano kaket nung ya- aonung mejangdang aser anepdang saakdang koda sarasademtsü aser tila tanur asüdang kechi inyakba ajanga kotaki otettsü ta asüba indang tanürtem nem tangatetba agüja lir.
Tongtibangsa tanü ama karaa ainba putu ka nung ibai tila tanürtem asoshi kangasa tapet aser tepuatsü keta züluba kaket ka lir. Ibai tanür küm 6-15 tsüngda asoshi tongtibang kaket ka asütsü.
Wb. P. Alem Jamiri tang iba ya zünga kaket ti buba adoker. Iba kaket ya jenjang Rs. 200/- lir aser CLC Dimapur aser ABAM Book Depot Mkg nung angutsü.