Kotak Sarasadem Lord’s Prayer)

— T. Tsukjem Jamir, Dimapur

Yisu Khrista iba  lima  nung  tebui tenyaba mapa  takok angutsü mechi Pai mapang  ajak  nung  Pa  kija bendanga  agüja sarasadem. “Yisui  anepdang  yakta  shishir  azüngmeyakdak  oa  sarasadem” Mk. 1:35.  Aser  ano  pai  nikongtsütsü  telok  aser  pa nütsüngtem  ajak  senshidaktsür pa  kija  tenemi  tua  sarasadem.” Mtt. 14:23.  Yisu  Khrista  Pa  asütsü  mapang  anasa  Gethsemane  atsüki  nung  bendanga  agüja  sarasademba  ajanga  kangki khuret tulu takok ngutet.  Aji  oda,  tanü  asenok kotak  lenmang  mechimetsü  atema  sarasademji  asen  sobutsü  asutsü  nüngdaka  lir. Yisui  aiben  pa  kija  sarasademba  nütsüngtemi  ngua,  kenü  anogo  Pa  dang nütsüngtemi koda  sarasademtsü  ta  asüngdang,  idangji  pai  parnok tareni  mendaktsü aser  yamai  sarasademtsü  sayu. Mtt. 6:9-13.
“Kotak  nung  aliba  obala,  nü nung  temeshi  süang.”  Ibai  tebu  Tsüngrem  kotak nung  aliba  temeshi  Tsüngrem  nem  konang nüngsang  tetushi  agütsüba  temaitsü  lir.  Kotakji  tebu Tsüngrem  den  temeshi pur  aliba  yimti  lir.  Laishibai  ashir,  kotak  nung  teti  tambur  metsür  pezü  jagi  chuba menden  nung  mena  aliba  tebu  Tsüngrem  madak  apudaka  kulema  ashir,  Haliluya !  tekümtet  aser  sentsüwangshi  nü  meyong  suang  ta  Pa  nem  tenüngsang  tetushi  agüja  Amen  amen ta  pa  külemer. J.A. 19:1-4.  Aji  oda,  tanü  amangba  purtemia  pa  tenüng  teti  asangtsü  nungdaka  lir. “Nü yimli arung, kotak  nung  koda  lir  alima  nunga  aji  oda  nü mulung sang.”  Kotak  lima ji  koda  tesünep tepela  lir, kong  timtim  tejashi  ayawara  reshikangshi  mali  yamaji  nai  yangluba  lima  nung  nü chirtema tepela  nung  kotak  mesüka  alitsü  sarasademtsü  sayu. “Anogo  shia chiyongtsü tanü onok  nem kua.”  Iba  olen  jagi  ashir,  Israel nübor  lisem  lima  nung  küm lir (40)  jajatang  anogo  shia  Yehova  Tsüngremi  MANA  agütsüba  ama,  tanü  pa  dak  amangba purtem nem  anogo  shia  pei  shi  temang  chiyongtsü  atema  pa  dang  meshia  sarasademba  lir,  ano  Yisui  tanüla  tsütsüa  yamai  ashi  nisungi  pei  takümji  am  tesa  kisüng  agi  taküm  alitsü  makok,  saka  Tsüngrem  bang  nungi  adokba O  shia  alitsü  ta  ashiba  ama,  tanü  amangba purtem  anogo  shia  pei  tanüla  asoshi  yaa  tzüraa Tsüngrem  nungi  pei  tanüla  chiyongtsü  peria  meshitsü maneni  nüngdaka  lir.
“Ozüi  kechi  oda  pi dang tai  toka  lir,  aji  oda  ozü tai tokangma.”  Yisu  Khristai  mimchir  dang  Tsüngrem  temeim  jungkai  adoka  sayuba  tulutibaji  tatok  agütsüba  ya  lir (Forgive  and  forget). Kenü  anogo  Peteri  Yisu  dangi  arua  asungdang ? “Kibuba  kü  adianui  ni  anema  tai  menara  ni  pa  tang  kwiben tai  atoktsüla ?  Idangji  Yisui  pa  dang  ashi,  nai  neterben tenet  tashi  tai  tokang Mtt. 18:24.  Tetezü  noklang  nung  noklang  100%  pei  adianu  dang  tai  atoktsü  indang  ashi,  ano  Yisui  pa  kangkidong  nung  angenlokdang  pa  tsükchirtem  dang  tai  atoktsü  indang  ashi, “Oba  parnok  tang  tai  tokang”  ta  ashiba  lai  nung  angur.  Aji  oda  asenok  Tsüngrem  nungi  tatok  angutsü  mechi  asenoki  asen  tsükchir  nem  tatok  agütsütsüla. “Joko  tamajungba  nungi  onok  sota  liangma.”  Yisu Khrist a anogo  lir (40)  aser  lir  aonung  tamajungba  tanülai  atidangba  mapang  pai  tebu  Tsüngrem  dang  sarasadema  Laishiba O  agi  tatidangji  takok  angu.  Yamaji  tanü  Khristanpurtem  temenen  satan  arura  aliba  mulusongzü  ama  arudang takok  angutsü  mechi  sarasadem  agi  akoktsü  merangtsüla.  Laishibai  ashir,  temeshipur  anogo  shia  pei  tamang  agi  alitsü  akanger.  “Kechiaser  yimli  ain  aser  sentsüwangshi teti  nü  meyong  sang.  Amen.”  Iba  oren  yaagi  ashir,  iba  lima  nung  maneni  pa  yimli  tesünep  tepela  teti  nisung  rongnung alitsü  atema Tsüngremer  Tanüla  temeshi  ain  tashi  teti  pa  nübur  den  lidakjang  aser  aji  shidak  amen ta  kuli  tembangba  lir.
O Tempang :
Kotak  sarasademji pa  nüburtem  tekülem  nung  rongnentsü  lir.  Iba  kotak  sarasademji  Tsüngrem  koda  tulu  aser  pa  dak  koda  amangtsü  lemang  sayuba  lir.  Kotak  sarasadem  ajanga tanü  asenok  Pa  den  majurutep  tashi  maneni  sarasadema  pei  tanula  jenjang ajungketsü  lenmang  sayuba  lir.
“Nai  maneni  sarasademang.” 2 Tesa. 4:17